Avammut niuerneq: Ruslandip pillaatitut iliuuseqarfigineqarnerani Savalimmiut iluanaaruteqarujussuarpoq

2017-imi Savalimmiut 2,4 milliardit nalinginut Ruslandimut avammut niueruteqarpoq. Aatsaat taama amerlatigipput. Ukiut qulit matuma siornat russit 100 millionit koruuninut pisisarput.

Nunat killerniittut ukiuni kingullerni arlalitsigut Ruslandimut pillaateqarlutik iliuuseqartarput, Tuluit Nunaannilu toqunartulimmik saassussisoqarnerata kingorna iliuuseqartoqaqqissinnaavoq.

2014-mi Krimimi tiguaasoqarnerata kingorna Savalimmiut pillaateqartunut ilaanikuunngilaq, russillu aamma akiniaallutik pillaateqarnerinut ilaatinneqaratik. Savalimmiut taarsiullugu Rusland avammut niuerfiini annerpaanngorpoq. 2014-imi Ruslandimut niuernerup 9 milliardit koruuninik amerlassuseqartut sisamararterutigaat, Hagstova Føroyamit (Savalimmiuni naatsorsueqqissaartarfik) kisitsisit takutippaat.

Sanilliullugu amerikamut aamma tulunnut niuerneq katillugit 20 procentiattut annertussuseqarpoq.

- Russit niuerfiat savalimmiormiut aningaasaqarnerannut pingaaruteqaleraluttuinnarpoq, økonomi Djóni Højgaard Kringvarp Føroyamut oqarpoq.

Unamminnerlerneq annikinnerusoq

Ruslandip nerisassat EU-meersut aamma Norgemeersut ukiut sisamat matuma siorna pisiariumajunnaarmatigit, aalisakkat ikerinnaasiortut aamma kapisillit ingmmik russinik piumaneqalerput. Tamatuma saniatigut Savalimmiut EU-mit pisiffigineqarumajunnaarpoq, aalisakkanillu ikerinnaasiortunik EU-mut niuersinnaanatik.

Ukiut qulit matuma siornatigut Savalimmiut taamaallaat Ruslandimut 100 millionit koruuninik tunisisarput. Taakku kisitsisit 2014-imi milliardinngorput, siornalu 2,4 milliardinngorlutik.

- Europamit russinut tunisisinnaanngitsunit unammillerteqannginnatta russit niuerfiannut maanna avammut tunisisarpugut. Akit qaffasinnerannik tamanna kinguneqarpoq, tamannalu pissarsiaqarluarnarpoq, Djóni Højgaard oqarpoq.

Savalimmiut taamaalilluni niuerfinnik allanik ujaasisariaqarnermit Ruslandip niueqatiginerani iluaqutissaqarpoq.

- Russinut niuersinnaanngitsuugutta savalimmiut avammut tunisisarnerat unammillerneqarnerussagaluarpoq, sinneqartoorutillu ikinnerussagaluarlutik, Djóni Højgaard oqarpoq.

Isornartorsiuineq nipaaruttoq

Savalimmiuni naalakkersuisut siulittaasorisimasaat, Kaj Leo Johannesen, Ruslandip EU-mit nerisassat pisiariumajunnaarnerata kinguninngua 2014-mi septembarimi Moskvaliarpoq, russit ministeriannik ataatsimeeqateqariartorluni.

Russit oqartussaasa naak Savalimmiut Danmarkimik naalagaaffeqateqaraluartoq, EU-mut ilaasortaannginneranik ilisimanninnissaannik qulakkeerinissaq siunertaavoq, taamaalillunilu pisiumaffigineqannginnermut ilaanani.

Savalimmiuni partiinit arlalinnit tamanna isornartorsiorneqarpoq, Ruslandimik tapersersuinermik kukkusumik takutitsineq pissutigalugu.

Taamani Danmarkimi nunanut allanut ministeri, Martin Lidegaard, Det radikale Venstreneersoq Savalimmiunit pisoq atornerlunneqassannginnissaa pingaaruteqartoq oqarpoq.

Isornartorsiuinerli kingorna annikillingaatsiarnikuuvoq, danskillu naalakkersuisuinit savalimmiut avammut tunisinerat pillugu aamma oqaaseqartoqarsimanngilaq.

Powered by Labrador CMS