Avaleraasartuut: Kalaallit imartaanni aalisarnerup siunissami pisassiissutit qulakkiissavaat
Aalisarnermut piniarnermut nunalerinermullu naalakkersuisoqarfiup KNAPK-p Sermitsiami oqariartuutigisai oqaaseqarfigai
Avaleraasartoornerniarnermut tunngatillugu Kalaallit Nunaat imminut naallerarpoq. KNAPK-mi Ikerinnarsiorluni natersiorlunilu aalisarnermut Siunnersuisoqatigiit siulittaasua, Michael Skourup Sermitsiamut oqarpoq.
Nunat tamalaat imartaanni aalisarsinnaanermut periarfissanik killilersuinermut taanna unnersuussivoq.
Kisianni tamanna pissutissaqarpoq, aalisarnermut piniarnermut nunalerinermullu naalakkersuisoqarfik akissummi allappoq. Ataatsimut isigalugu Kalaallit Nunaat siunissami avaleraasartuunut pisassiissutit pillugit isumaqaatiginninnialeruni, sapinngisamik nukittunerpaamik inissisimanissaanut tunngassuteqarpoq.
Inatsisit ima katiterneqarsimapput, pisassiissutit 80 procentii aalisareersimagaanni juunip 30-at sioqqullugu taamaallaat nunat tamalaat imartaanni aalisartoqarsinnaalluni imaluunniit septembarip aallaqqaataanit. Paasissutissamik tamatuminnga Michael Skourupip nassuiaataa naqqiuteqarfigaa.
Avaleraasartuut sapinngisamik amerlanerpaat Nunatta imartaani pisarineqarnissaat, inatsisit tunuliaqutigaat.
- Kalaallit imartaanni avaleraasartuut pisat amerlassusaat siunissami naalagaaffiit sineriallit isumaqatiginninnialerpata pingaaruteqartussaanerat tassani eqqarsaatigineqassaaq. Kalaallit Nunaat naalagaaffiit sineriallit nunat tamalaat imartaanni aalisarnermik tunngavilimmik pisassiissutinut piumasaqarsinnaanngilaq. Taamaattumik ungasissoq eqqarsaatigalugu Kalaallit Nunaata soqutigisaraa, Kalaallit Nunaata avaleraasartoortassai pingaarnertut kalaallit immikkoortuani aalisarneqarnissaat, naalakkersuisoqarfik oqaaseqaammini allappoq.
Michael Skourupip aammattaaq Kalaallit Nunaata nunat tamalaat imartaanni pisassiissutit 20 procentii taamaallaat aalisarsinnaammagit isornartorsiorpaa, akerlianik Islandip pisassami 35 procentii tassani aasinnaagai.
- Islandip 2017 avaleraasartoortassaasa tamakkiisut 35 procentiisa missaat nunat tamalaat immikkoortuani aalisarneqarnerat ilumoorpoq, kisianni taamaattuaannarnikuunngilaq, tamannalu Michael Skourupip oqaatiginngilaa. Island 2010-imi avaleraasartoorniarnermi naalagaaffittut sinerialittut akuerineqarpoq. Islandip 2010-mit 2016-imut katillugu avaleraasartuut agguaqatigiisillugu nunat tamalaat immikkoortuani pisaat 3 procentinik ikileriarput. Akerlianik kalaallit umiarsuaasa 2018-imi TAC-mit 20 procentit nunat tamalaat imartaanni aalisarsinnaavaat, naalakkersuisoqarfimmit taama akissuteqartoqarpoq.
Michael Skourupip isornartorsiunera pillugu allaaserisaq tamaat Sermitsiami atuarsinnaavat: