Avaleraasartuut pillugit isumaqatiginninniarnerit nunat ataasiakkaat namminneq pisarerusutaminnik aalajangiinerannik aammaasiit inerneqarpoq
Nunat sineriattallit Atlantikorsuup avannamut kangiani avaleraasartuunik aalisarnerup agguataarnissaa isumaqatigiinngissutigaat. Biologit aalisapiluttoqarnissaata ingerlaannarnissaa aarleqqutigaat.
Atlantikorsuup avannamut kangiata ilaani avaleraasartuunik aalisapilunneq ingerlaannassaaq.
Aviisi Sermitsiaq taama allappoq.
Taamatut biologit aarleqquteqarput, naak Savalimmiut, Kalaallit Nunaata, Islandip, Norgep, Tuluit Nunaata aamma EU-p oktobarip naalernerani Londonimi isumaqatiginninniarnerni isumaqatigiissutigigaluaraat nunat tamalaat imaanik misissuinermut rådiata (ICES) innersuussutaa malinniarlugu.
Rådip innersuussutigaa annerpaamik pisassat katillugit, TAC, avaleraasartuut 794.920 tonsit 2022-mi pisarineqarnissaat. Kisianni nunat pisassarititaasup agguataarnissaa isumaqatigiissutigisinnaanngilaat. Tamanna inerneqarpoq nunat ataasiakkaat aappaagu pisassarititaasut annertussusissaannik namminneq aalajangiinissaannik. Tassa allatut oqaatigalugu immap pisuussutaanik qanorluunniit annertussuseqaraluarpata nunanut sineriattalinnut takannaartoqarneranik.
- Nunat TAC isumaqatigaat, kisianni isumaqatigiinngissutigalugu pisassarititaasut qanoq namminneq qanoq agguataassanerlugit. Taamaammat naatsorsuutigineqarsinnaavoq nunat 2021-misulli 2022-mi iliuuseqarpata, taava avaleraasartuunik aalisapiluttoqassaaq ICES-ip innersuussutaanit 40 procentinik annertunerusunik. Kikkut tamarmik nalunngilaat tamanna piujuaannartitsinerunngitsoq, taamak oqarpoq dr.scient. Jan Arge Jacobsen Savalimmiuni immamik ilisimatusarnermik institutimit Havstovanimeersoq.
Londonimi isumaqatigiinniarluni ataatsimiinnerni peqataasut arfiniliusut tassaapput: Savalimmiut, Kalaallit Nunaat, Island, Norge, Tuluit Nunaat aamma EU, kiisalu Rusland, malinnaalluni peqataasoq, namminneq 2022-mi pisassarititaasut qanoq annertutiginissaat aalajangerniarpaat. Soorlu 2021-mi taamaaliortut.
- Ajuusaarnarpoq aalisapiluttoqarnera, taamatullu ingerlaannartoqarsinnaanngilaq. Ajutoortoqassaaq, Jan Arge Jacobsen oqarpoq, ICES-ip ilisimatusarnermut komiteani ilaasortaasoq.
Aviisimi Sermitsiami atuarnerusinnaavutit. Aviisi uani pissarsiariuk: