tusarluarnartut
Avaleraasartuunik qaleralinnillu nunanut allanut tunisaqarneq niuernermut angusaqarluartitsivoq
Niuernerup oqimaaqatigiissinnerani amigartoorut ukiut tulleriit pingasut appariartorpoq. Ikummatissianik taakkunanngalu tunisassiat avammut tunineqarnerat appariarpoq
Avaleraasartuunik qaleralinnillu nunanut allanut tunisinerit pissutaallutik avammut tunisassiornermi sinneqartoortoqaqqippoq ukiut pingasut ingerlatiinnarlugit.
Naatsorsueqqissaartarfiup kisitsisaataani tamanna takuneqarsinnaavoq.
2014-imi nioqqutissanik avammut tunisineq 3.028 million koruunit nalinginik isertitaqarfiuvoq. Tamanna ukiumut siulianut sanilliullugu 277 million koruuninik isertitsiffiuneruvoq, qaffariaat procentinngorlugu 10,1-iulluni.
Isertitsineruneq Avaleraasartuunik Qaleralinnillu nunanut allanut tunisinerunermiit pivoq, taakkunannga nunanut allanut tunisat 236 million koruuninik aammalu 143 million koruuninik ukiup siulianut sanilliullugu qaffariarsimammata.
2014-imi nunat allat nioqqutissiaannik nunatsinnut eqqussuineq 4.306 million koruuninik naleqarpoq, ukiup siulianut sanilliullugu 310 million koruuninik appariarfiulluni. Appariaammut tunngaviuneruvoq ikummatissiat taakkunanngalu tunisassiat eqqussorneqarnerisa annikilleriarnerat, 2014-imi ukiup siulianut sanilliullugu nioqqutissianik taakkunannga eqqussuineq 204 million koruuninik appariarmat.
Niuernermi oqimaaqatigiissut 2010-mit 2014-mut takussutissiaq ataani takuuk