Avaleraasartoortassat pillugit isumaqatiginninniarnerit ajalusoormata aatsaat taamak annertutigisunik pisassiissuteqartoqartoq
Naalagaaffiit sineriallit 2021-mi avaleraaasartoortassat pillugit isumaqatiginninniarnerminni angusaqanngitsoorsimapput, nunat taamaalillutik namminneq pisassiissutissatik aalajangersarsimavaat. Immap uumasuinik ilisimatusartup imminissarsiornissaq mianersoqqutigivaa.
Nunani tamalaani aalisarnermik ingerlatseqatigiiffiup ICES-ip attanneqarsinnaasutut naliligaanit avaleraasartoortassat tamarmiusut 42 procentimik qaffasinnerupput.
Tuluit Nunaata, EU-p, Savalimmiut, Norgep, Kalaallit Nunaata, Islandip Ruslandillu avaleraasartoortassat agguaanneqarnissaat pillugit isumaqatigiissinnaannginnerisa malitsigisaanik, nunat namminneq pisassaminnik aalajangersaammata 1,2 millioner tonsit pisassiissutigineqarsimapput.
Savalimmiormiut 167.000 tonsinik imminnut pisassissimapput, Savalimmiormiullu aatsaat taamak pisassaqartigalutik.
- Aalisagarpassuit qaqinneqartussaapput. Naatsorsuutigaarpulli Savalimmiormiut aalisariutaasa tamaasa pisarisinnaassagaat, Savalimmiuni aalisarnermut naalakkersuissoq Jacok Vestergaard (Folkeflokken) Kringvarp Føroya-mut oqarpoq.
UK sinerialittut naalagaaffiusoq
Savalimmiut, Norge EU-lu avaleraasartoortassat pillugit ukiuni arlalinni isumaqatigiissuteqartarsimapput, Brexitsili - Tuluit Nunaata EU-mit aninera - atuutilermat isumaqatigiissuteqartoqarsinnaasimanngilaq.
Kringvarp Føroya-mit ilisimatitsissutigineqarpoq, pisassiissutit tamarmiusut affaasa missaannik EU Tuluillu Nunaat piumasaqarsimasut. Taamatut pisoqarmat Norge pisassiissutit 35 procentiannik imminut pisassissimavoq.
- Nunat allat imminnut pisassinneqartut sanianut pilluta isigiinnarsinnaanngilarput. Savalimmiuni ukiuni kingullerni anguneqartarsimasut annertoqqataannik pissarsisariaqarpugut. Isumaqatigiissuteqarsinnaanerput neriuutigaarput, Jacob Vestergaard oqarpoq.
2014-imiilli ikiliartulersimasut
Naalagaaffiit sineriallit siorna decembarip qaammataani isumaqatigiissutigisimagaluarpaat, 852.284 tonsit pisassiissutigineqassasut. Savalimmiut ukioq manna 852.284 tonsit 19,6 procentiinik pissarsisussaagaluarput.
Savalimmiuni immap uumasuinik ilisimatusartup Jan Arge Jacobsenip taamatut ineriartortoqarnera ernunamarnerarpaa.
- Aavaleraasartuut 2014-imili ikiliartulersimapput. Inassuteqaatitsinnit amerlanerusunik aalisartoqarniarnera ernumanartuuvoq, Jan Arge Jacobsen oqarpoq.
Suffisinnaasulli amerlasoorpassuummata avaleraasartuut ukioq manna ulorianartorsiortinneqassanngillat.
- Inassuteqaatigineqartut 40 procentii sinnerlugit pisarineqartarnerat ukiuni arlalinni pisassappat ajorluinnartumik kinguneqarsinnaavoq, Jan Arge Jacobsen oqarpoq.