Aalisarneq
Avaleraasartoorniarneq naavoq – ammassassuarniarneq aallartippoq
Tunumi ukioq manna avaleraasartoortassanit 85.000 tonsinit 35.410 tonsit pisarineqarput
Ukioq manna avaleraasartoorniarneq unippoq, angallatillu tamarmik Tunumi avaleraasartooqarfik qimareerpaat.
Kalaallit angallataasa angallatillu Islandimit, Savalimmiunit Ruslandimillu attartorneqarsimasut ukioq manna avaleraasartoortassanit 85.000 tonsinit 35.410 tonsit pisarisimavaat – tassa pisassiissutit affaat inorujussuarlugit.
Ukioq manna pisat 35.410 tonsit ukiuni kingullerni Tunumi avaleraasartoorniartarnermi pisarineqartartunut sanilliunneqarsinnaapput:
- 2015: 32.428 tonsit.
- 2014: 78.405 tonsit.
- 2013: 53.600 tonsit.
Atuaruk: Avaleraasartoorniarnerup iluatsinngitsoorneranut pissutaasut pingasut
Ullumikkut kalaallit angallataat arfinillit Tunumi ammassassuarniarput, piffissamilu matumani nalunaartarput ammassassuarniarnermi taamaallaat avaleraasartuut saniatigut pisarineqartartut.
Kalaallit Nunaat 20.000 tonsinik ammassassuartassaqarpoq, kalaallilli angallataat kisimik ammassassuarniarnissamut akuersissummik tunineqartarput, taamaattumillu nunat allamiut angallataat nunatsinnit aallareersimapput.
Kalaallit Nunaat aamma misileraalluni saarullernarniarnermut 15.000 tonsinik pisassiisimavoq.