Avalammi siulittaasoq: Ilinniarnermik naammassinnittut amerlanerusut ima angerlartinneqarsinnaapput
Ilinniartut ilinniakkaminnik nunani allani naammassinnittut amerlanerusut angerlartinneqartalersinnaanersut, Inatsisartuni politikerit oqallisigissavaat. Ilinniartut peqatigiiffianni Avalammi siulittaasoq siunnersuuteqarpoq.
Demokraatineersoq Steen Lynge apeqquteqaat naapertorlugu oqallisigisassamik siunnersuuteqarpoq, ‘’Inuusuttut nunanut allanut ilinniariarsimasut inuiaqatigiinnut ilisimasaminnik piginnaasaminnillu ilapittuutaajartorlutik angerlaqqinnissaminnut piumassuseqarnerulernissaat anguniarlugu uagut Inatsisartuni ilaasortat qanoq iliorluta inuusuttut nunaminnut sakkortuumik attuumassuteqartutut misigisimalersissinnaanerigut pillugu’’
Siunnersuutini ilaatigut, nunami allami ilinniarsimasut 56 procentii ukiut qulit qaaniguttut Kalaallit Nunaanni najugaqarnerannik, tamanna ‘’Sulisussarsiortarneq aamma sulisoreersut pigiinnartarnissaat pillugu nassuiaat’’-mi atuarneqarsinnaanerarpaa.
Danmarkimi kalaallit ilinniagaqartut peqatigiiffianni Avalammi siulittaasunngorlaaq, Hans Peter Mønsted, ilinniareernerup kingorna angerlassagunik suna pingaartinneraat pillugu Sermitsiaq.AG-p oqaloqatigaa.
Suliffiit periarfissat ttakutillugit
- Suliffeqarfiit suliffissatut suut periarfissaanersut aamma suliassaanersut takutinnerusuugunikkit pitsaassaaq, Hans Peter Mønsted oqarpoq, taanna Syddansk Universitetimi psykoligitut kandidatinngorniarpoq.
Pisortani aamma namminersortuni suliffissatut periarfissanik nittartakkanik suliffissanik saqqummersitsiffiusunik assigiinngitsunik peqartoq ilisimavaa. Kisianni sulisussarsiorluni allagartaliinerit naammattuaannanngitsut isumaqarpoq, Kommuneqarfik Sermersoorlu assersuutitsialattut oqaatigaa.
- Kommuni aasaanerani suliffissanik Danmarkimi aamma nunani allani ilinniartunut neqorooruteqartarpoq, tassani ilinniartut misilittagaqalerlutillu suliffeqarfimmut atassuteqalertarput, Avalammi siulittaasoq oqarpoq, suliffeqarfiit allat taamatut assingusumik neqerooruteqarsinnaappata pitsaasuusoq isumaqarpoq.
Kisianni aamma Hans Peter Mønstedip nassuerutigaa, ilinniartut peqatigiiffiata ilinniakkamik naammassinninnerup kingorna suliffissatut periarfissarpassuit takutinnerusinnaagaluarai.
Arlaleriarlutik angerlartarnissaat
Ilinniartut ilinniarnerminni arlaleriarlutik angerlarsinnaasarnissaat qanoq qulakkeerneqarssinnaaneresoq pisariaqartoq, Steen Lynge isumaqarpoq.
- Ilisimatusarfimmi semesteri ataaseq ingerlanneqarsinnaavoq immaqaluunniit Namminersorlutik Oqartussani, kommunit arlaanni imaluunniit sulliviit arlaanni ilinniarnermut atatillugu sungiusaatigalugu sulisoqarsinnaavoq, apeqquteqaat naapertorlugu oqallitsitsinissamik siunnersuummini taanna allappoq.
Inissiat, paaqqinnittarfinni inissat aamma politikki
Ilinniartut angerlarunik inissaqarnissartik pingaartikkaat, aamma meeraqarunik meeraaqqerivinni meeqqerivinnilu inissaqarnissaat pingaartikkaat, Avalammi siulittaasup aamma oqaluttuaraa. Ataatsimut isigalugu inissaaleqisoqarlunilu paaqqinnittarfinni inissarsiniarnermi utaqqineq sivisusarpoq.
Qulaani tunngaviusumik pisariaqartinneqartut kisimik ilinniartut ilinniakkamik naammassinninnerminnit uterusussusaannut aalajangiisuuneq ajorput.
- Nunatsinni politikkikkut allanngorartumik ingerlaneq aamma ilinniartut ilaannut sunniuteqarsinnaavoq, Hans Peter Mønsted oqarpoq, taanna siornatigut Danmarkimi ilinniartut akornanni atugarissaarneq pillugu misissuinermut innersuussivoq, tassani taanna sammisaq apeqqutigineqarsimammat. Taassuma aamma piffissami kingullermi naalakkersuisoqatigiit allanngorarnerat assersuutitut eqqaavaa.
Angerlarnissamut piumassuseqartoq
Avalammi siulittaaasoq ilinniakkaminik naammassinnikkuni angerlarnissaminut pilersaaruteqarpoq.
- Angerlarnissannut piumassuseqarpunga, taanna oqarpoq.
Apeqquteqaat naapertorlugu oqallisissatut siunnersuut Inatsisartuni sisamanngornermi oqallisigineqartussaagaluarpoq, kisianni angumerineqannginnami kinguartinneqarpoq, suliarineqarnissaata ullua kingusinnerusukkut nalunaarutigineqassaaq.