Avalak pillugu kukkuluttorneq IA-p nassuerutigaa
Avalammut tapiissutit annertuumik sipaarniarfigineqarnerat Inuit Ataqatigiit Inatsisartunut ilaasortaataasa, aningaasanut inatsit akuerigamikku arajutsisimavaat.
Inuit Ataqatigiit aningaasanut inatsit akuerigamikku arajutsisaqarsimapput, taanna ilinnirtut peqatigiiffiannut Avalammut aningaasaliissutit 404.000 koruuninit 200.000 koruuninut ikilisitsinermik imaqarpoq. Partiip ilinniartitaanermut oqaaseqartartuata, Sofia Geislerip tusagassiuutinut nalunaarummi nassuerutigaa.
- Aningaasanut Inatsit 2019-imoortoq akuersissutigigatsigu AVALAK-mut tapiissutit affaannanngortinneqarsimanerat eqqumaffiginngitsoorsimagatsigu ajuusaarutigissavarput. 2019-imut Aningaasanut Inatsisissatut siunnersuut pillugu isumaqatiginninniarnerit inaarsarneqarneranni AVALAK-mut tunngasut immikkut isumaqatiginninniutaasimanngillat, taamannalu patsisaalluarsinnaavoq eqqumaffiginninngitsoorsimanitsinnut, taanna oqarpoq.
Avalaap kalaallinut Danmarkimi ilinniartunut aaqqissuuttagaannut sipaarniartoqarnera eqquissasoq, Avalammi siulittaasup Hans Peter Mønstedip oqaatigaa.
- Inuit Ataqatigiinniit ajuusaarutigissavarput ilinniartut Danmarkimiittut peqatigiiffiannut AVALAK-mut ukiumoortumik tapiissutaasartut ukiormanna ukiunilu aggersuni missingersuusiorfiusuni affaannanngortinneqarsimanerat, Sofia Geisler (IA) oqarpoq.
Aappaagu qaffanneqarnissaa sulissutiginiaraat
Kisianni ukioq manna taanna aaqqiissuteqarfigineqarnavianngitsoq atuarneqarsinnaavoq.
- Ilinniartitaanermut, Kultureqarnermut Ilageeqarnermullu Ataatsimiititaliap saniatigut periarfissagut tamaasa atorlugit piffissami aggersumi Aningaasanullu Inatsisissap tulliuttup akuersissutigineqarnissaata tungaanut AVALAK-mut tapiissutaasartut qaffaqqissinnaanerannut Inuit Ataqatigiinniit ujartuissaagut. Qularutissaanngilarmi AVALAK tassaammat ilinniariarlutik Danmarkimiittut nunatsinnut attaveqarnerisa annerpaaffimminiittuaannarnissaanik pingaarutilimmik suliaqartoq.
Ineqi Kielsenip aalajangerneq isornartorsiorpaa
Siumup iluanit sipaarniarneq aamma akerlerinqarpoq, taanna aningaasanut inatsimmut tunngatillugu partiip akuerinikuuaa.
- Siumup siunnersuutaani siullermi ilaanngilaq, kisianni pingajussaaneerneqarnissaa sioqqullugu ilanngunneqarluni akuerineqarpoq. Taamatut tulleriaarineq isumaqatiginngilara, Ineqi Kielsen oqarpoq, taanna partiip Folketingimut qinigassanngortitaraa.
Taanna Inatsisartunut ilaasortaanngilaq, aningaasanullu inatsimmik akuerseqataanngilaq.
- Inuusuttuulluni ilinniarluni Nunatsinnut attaveqarluarnissaq taamaattumik pingaaruteqarluinnarpoq. Avalammit tamanna suleqaataaffigineqarpoq.
- Avalaap peqatigiiffitsik ingerlatinniarlugu pisariaqartitaminnik tapiiffigineqarnissaat taamaammat pingaaruteqarluinnarpoq.
Sooq sipaarniartoqarsimaneranik Naalakkersuisut nassuiaatinniarlugit Avalammi siulersuisut iluatsinngitsumik noqqaassuteqaraluarsimapput.