Ilinniarneq
AVALAK: Ilinniarsinnaanerup killilerneqarnera suli ajornartorsiutaavoq
Kalaallit Danmarkimi ilinniartut suli eqqugaasinnaapput, naak danskit naalakkersuisuisa ilinniarnerup qummut killilerneqarneranut siunnersuut allanngortikkaluaraat
Perorsaasutut ilinniagaqareeraanni ilinniartitsisutut ilinniartoqarsinnaajunnaarpoq. Peqqissaasuugaanni nakorsanngorniartoqarsinnaanngilaq, aamma ilinniartitsisoq inatsisilerituunngorniarsinnaanngilaq.
Juulli sioqqullu Folketingimi amerlanerussuteqartut ilinniarnissamut qummut killiliinerat taama isikkoqarpoq. Sapaatip-akunnerani kingullermi tamanna allanngortinneqarpoq, taamaalilluni maanna nutaamik ilinniaqqittoqarsinnaanngorluni, kisianni ilinniaqqinniaraanni ukiuni arfinilinni utaqqeqqaartariaqarpoq.
Pitsaanerusoq - kisianni pitsaanngitsoq
Kalaallit Danmarkimi ilinniartut peqatigiiffiat, AVALAK suli isornartorsiuivoq.
- AVALAK-mit allannguineq pitsaanerusutut, kisianni pitsaanngitsutut isigaarput, peqatigiiffimmi siulittaasoq, Marie A. Kahlig, Sermitsiaq.AG-mut mailimi allappoq.
Inuit ilinniakkaminnik naammassisaqareersut ilinniakkamik assingusumik pitsaassusilimmik ilinniaqqikkaangamik, inuiaqatigiinnut akisunera danskit naalakkersuisuisa tunngavilersuutigaat.
Ilinniaqqinnissamut periarfissaq pingaarutilik
Tamanna kukkunerulluinnarpoq, ingammik kalaallit isaannit isigalugu, AVALAK isumaqarpoq.
- Kalaallit atugaannit isigalugu siunnersuutip iluserisimasaa aaqqissuuteqqinneqarneratalu akerlilerpaa, tassa ilinniartunut soraarummeertunullu piginnaasanik nukittorsaanissamut periarfissiineq. Ilinniarnerup sipaarniarfigineqarnissaa tunngavigalugu siunnersuut pilersinneqarpoq, tamanna siunertaq Kalaallit Nunaata unammilligassaanut tulluartuunngilaq, Marie A. Kahlig isumaqarpoq.
Kalaallit Nunaat ingammik inuit ilinniarsimasut piginnaasatik ineriartortillugillu ilaartorsinnaanissaannut pingaaruteqartitsilluni inissisimasoq, AVALAK isumaqarpoq.
Atuaruk: Nivi Olsenip ilinniartut pillugit oqaatsini utoqqatsissutigai
'Ukiut arfinillit qaangiukkaangata aallaqqittoqartassava?'
Tamatuma saniatigut ilinniarnissamut qummut killiliussaq nutaaq, ukiuni arfinilinni utaqqiffiusartussaq Nunatsinneersuugaanni ingammik ajornartorsiutaasoq, Mari A. Kahlig isumaqarpoq.
- Soraarummeertut angerlarlutik suliartortarnissaa, tamatumalu kingorna aallaqqittarnissaat tassani eqqarsaatigaarput, taanna allappoq.
Ilaquttat qimallugit qularnartumik Danmarkimut ilinniariarluni aallaqqinnissamut piumassuseq annertunavianngitsoq, Marie A. Kahligip nalilerpaa.
Inuusuttullu aallaqqissagaluarunik, taava Nunatta minnerusumik iluaqutigissavai, AVALAK isumaqarpoq.
- Soraarummeersimasut ukiuni arfinilinni utaqqissagunik, tamatumi nammineq nunagisami aallussinissamut piumassuseq sunnissavaa, - tassami aallaqqittussaagamik, AVALAK-mi siulittaasoq, Marie A. Kahlig allappoq.