ATV-nut aqqutissap ilaa suli atorneqalerani ajortissimavoq
Sisimiut Kangerlussuullu akornanni ATV-nut aqqutissaq 2022-mi aasaanerani tamanut aatsaat ammarneqartussaavoq. Sulinermi biilit atorneqartartut oqimaatsut aqquserniap ilaa ajoqusersimavaat.
Kangerlussuarmiit Kangerluarsuk Tullermut ATV-nut aqquserniami 16 kilometerit siulliit naammaginanngillat, aqquserniorneq naatsorsuutigisamit sukkanerusumik ingerlarsimagaluartoq.
Qeqqata Kommuniani borgmesterip Malik Berthelsenip kommunalbestyrelsi apriilip 28-ani ataatsimiimmat tamanna ilisimatitsissutigisimavaa.
- 16 km siulliit 40 km kingulliillu naammaginartunik suliaanngillat. 40 km kingullerni aqquserngup ataatigut kuuffissanik inissiisoqarnikuunngilaq, ilaatigut aqquserngup ataatigut kuuffissat pisiaanikuusut Kangerlussuarmi inissisimasut aqqummut assartorneqarnissaat oqimaappallaarmata.
- 16 km siulliit sanaartornerup ingerlanerani oqimaappallaartunik ingerlavigineqartarnermik ajortissimasoq maannakkorpiaq ersarissivoq, 2020-mi 2021-milu aallartisarnermi ulluni sialleqattaarfiusimasuni eqqugaanikuugamik, ataatsimiinnermit imaqarniliami allassimavoq.
Allanngortinneqassasoq
Nunalerinermut, Imminut Pilersornermut, Nukissiornermut Avatangiisinullu Naalakkersuisoqarfik ATV-nut aqquserniornermik 2021-mi juulip arfineq-pingajuani nalilersuisimavoq.
Naalakkersuisoqarfimmit oqaatigineqarsimavoq, ingerlaarfimmi marallunnguunnerit annertoorujussuusut. Tamannalu tunngavigalugu kommunip Masanti ATV-nut aqquserngiortuusoq attavigisimavaa.
ATV-nut aqquserniami ajortissimasunik aaqqissuussilluni suliaqarnissaq siusinnerpaamik maajimi aallartinneqarsinnaavoq.
- Aqqut ajuusaarnartumik 2020-mi masarsoqarfiit ilaatigut ingerlavilerneqarnera allanngortitsinerni isiginiarneqassaaq. Allannguutit siusinnerpaamik 2022-mi maajimi/juunimi ingerlanneqarnissaat naatsorsuutigineqassaaq, taamaattumik ATV-nut aqqut 2022 aasaanera sioqqullugu atulersinneqarsinnaanngilaq. Siunnersuutit taakku Naalakkersuisoqarfiup akuersissutiginikuuai, imaqarniliami allassimavoq.
Borgmesterip Malik Berthelsenip kommunalbestyrelsimut aamma ilisimatitsissutigisimavaa, Kangerluarsuk Tullermiit Sisimiunut ATV-nut aqqutissamut atatillugu Namminersorlutik Oqartussat VVM-imut atatillugu piumasaqaataat kommunimit suli tiguneqarsimanngitsut. Taamaammat isumaqatigiissusiornissaq ATV-nullu aqqutissap ilaata pineqartup, sumiiffimmi imeqarfikkoortussap suliarineqarnissaanut suliariumannittussarsiuussinissaq kinguartinneqarsimapput.