ATV-nut aqqut iluaqutaalluarsinnaavoq

Sisimiunit Kangerlussuarmut ATV-nut aqqusinniornissaq qulakkeeriartorneqalerpoq. Aqqullu aqqusinniornissamut alloriarneq siullissasoq Qeqqata kommuniani kommunalbestyrelsip aalajangiuppaa.

Atuaruk: Kommuni 15 millioninik nalilimmik ATV-nut aqquserniulertoq

Aqqusinniornissaq aningaasaliiffigineqanngilaq

ATV-nut aqqutiliornissamik aalajangerneq aqqusinniassaq Naalakkersuisunit taperserneqannginnerata kinguneraa.

- Allaffeqarfiup nalilerpaa, inuutissarsiornerup ineriartortinneqarnissaa Namminersorlutik Oqartussanit kingulliutinneqartuassappat, Sisimiut Kangerlussuullu akornanni aqqusinermut atatillugu attartorsinnaanermut Namminersorlutik Oqartussanit akuersissummik pissarsisinnaanissaq periarfissaqanngitsoq.

Atuaruk: Aqqusinniortoqassanersoq paaserusunneqartoq

Aqquteeraq aqqusininngorsinnaavoq

Aqqusiortoqarpat takornarialerisunit atorluarneqassasoq Qeqqata kommuniata qularinngilaa.

- Allaffeqarfiup nalilerpaa, aqqusineq atorluarneqassasoq, qanorlu pisoqanngitsoq aqqusinivinngortinneqarsinnaassasoq.

Atuaruk: Bussinik Kangerlussuarmut

Pinngortitamut akornutaannginnissaa qulakkeerneqassaaq

Aqquteeraliortoqassappat aqqussinniortoqassagaluarpalluunniit avatangiisinut innarliisinnaaneranik misissuititsisoqareerpoq. Taamaasilluni aqqusinniortoqarnissaa akuerineqassagaluarpat misissuinermik nutaamik sanatitsisoqartariaqassanani.

Atuaruk: ATV-nut aqqut inuussutissanik atuilluarnissamut aqqutaasoq ilimagaa

Namminersorlutik oqartussat

ATV-nut aqqut kommunip pilersaarutaa malillugu piviusunngussappat aqqusinniortoqarnissaanut piareersimapput.

- Tamatuma saniatigut aqqusineq sanaartorneqariarpat, Sisimiut Kangerlussuullu akornanni aqqusinivimmik, Kalaallit Nunaannut annertuumik iluaqutaasussamik sanaartortoqarsinnaasoq Namminersorlutik Oqartussanut aningaasaliisinnaasunullu uppernarsineqassaaq.

Amerlanerussuteqartut kingaallatsitsipput

Aqquteeraliassap sananeqarnissaanut sanajumasunik neqeroortitsisoqassasoq amerlanerussuteqartut akuersissutigaat. Kommunilli aningaasaqarnermut ataatsimiititaliaata avatangiisinut innarliisinnaanermut misissuineq aningaasaqarnermullu kingunerisinnaasai tusarniaassutigineqaqqaassasut piumasaraat. Tamanna pereerpat kommunalbestyrelsip suliaq ingerlateqqissinnaassavaa.

Suliaq ingerlariaqqissapput avatangiisinut innarliisinnaanerani misissuinermit nalunaarusiaq Namminersorlutik Oqartussanit akuersissutigineqaqqaartussaavoq.