ATV-mut aqqut: Sulineq aallartissinnaanngorpoq
Kangerlussuup Sisimiullu akornanni aqquserniornissamut nivariarneq siulleq ippassaq ataasinngornermi pivoq
Qeqqata Kommuniata anguniakkani ilaat ataasinngornermi julip 20-ani anguaa. Borgmester Malik Berthelsen (S) Kangerlussuup ungasinngisaani Kelluvillemi nivariarnermik siullermik nivappoq, taamaasilluni Kangerlussuup Sisimiullu akornanni aqquserniorneq aallartissinnaanngorluni.
Aqqusinissaq 130 kilometerisut isorartutigissaaq, MT Højgaardilu suliaqartuussalluni. Suliami Qeqqata Kommuniata Rambøll suleqatigaa. Kommuni aqquserniornissamut 22 milliuunit koruuninik immikkoortitsisimavoq. Aqqusineq Kangerlussuarmiit Sisimiut kujataata tungaanut Kangerluarsuk Tullermut ingerlassaaq.
Kommunimut alloriarneq annertooq
Borgmester Malik Berthelsen oqalugiarnermini aqquserniorneq alloriarnerusoq annertooq oqariartuuteqarpoq:
- Kommunini allani ineriartorneq ingiinnarluta, katataajartuutigalutalu isiginnaartuuffigiinnarusunngilarput. Qeqqata kommuniani aamma uagut ineriartornermut peqataarusuppugut. Nunarsuarmioqatitta nunatsinnut tikittartut amerlisarneqarnissaannut aamma uagut peqataarusuppugut. Taamaattumik ullumikkut persuarsioqaanga nunarujussuaq nunatsinni misigisassarsiorluni takornariartitsiffigissallugu (adventure turisme) piukkunnarnerpaat ilagiligassaata, nivariaqqaarfiginissaa ilissi peqatigalusi ingerlassinnaagakku, borgmester Malik Berthelsen oqalugiarnermini oqarpoq.
ATV-nut aqqut aappaagu naammassisussatut naatsorsuutigineqarpoq.
Kangerluarsuk Tullermit Sisimiut tungaanut aqqut pillugu VVM-imut nalunaarusiaq nutartigaq ukioq manna akuerineqartussatut naatsorsuutigineqarpoq.