feeriarnissaq qatangiinnartoq
Atuisartunut Siunnersuisoqatigiit Greenland Express Air misissuiffigigaat
Atuisoq, Atuisartunut Siunnersuisoqatigiit, Greenland Express Air pillugu saaffiginnissutit arlallit tunngavigalugit aasaanerani ulappuserpoq. Timmisartumik angalaniat aningaasaannaanngitsunik neqeroorfigineqassapput, oqaatigineqarpoq
Atuisartunut siunnersuisoqatigiit Atuisoq Greenland Express Air pillugu nalornissuteqartuarnermut atatillugu Avannaanit saaffiginnissutit marluk Tysklandimillu saaffiginnissut ataaseq tunngavigalugit ulluni kingullerni marlunni ulapissimavoq.
- Suliami tassani inatsiserpaalussuit isiginiarneqartussaapput, atuisartunut siunnersorti Malene Lynge Sermitsiaq.AG-mut oqarpoq.
Aasaanerani paatsiveerusimaarneq
- Inuppassuit paatsiveerusimaarput EU-mi avataanilu inatsisit assigiinngitsuummata. Tamatuma saniatigut Greenland Express Air timmisartortitseqatigiiffittut isigineqarsinnaanersoq isigineqarsinnaannginnnersorluunniit nalornissutigineqarpoq, nassuiaavoq.
Atuisoq suliaqarnermini inerniliivoq, Gert Braskip timmisartuussisarnermik suliaqarfia timmisartumut bilitsinut pisiarineqarsimasunut aningaasanik utertitsinisamik neqerooruteqaannarsinnaanngitsoq.
- Atuisoq angalanissamik nutaamik neqeroorfigineqassaaq, aningaasanik utertitsinissaq neqeroorutaanngilaq. Angernissamut naaggaarnissamulluunniit periarfissiinngllat. Suleriaaseq pitsaavallaangilaq.
Timmisartortitseqatigiiffiua?
Greenland Express Air inatsisitigut timmisartortitseqatigiiffittut isigineqarsinnaanersoq piumasaqaateqarfigineqarsinnaanersorlu Atuisumit misissorneqaleruttorpoq.
- BH Air maannakkorpiaq Greenland Express Air sinnerlugu timmisartuussisussaavoq, siunnersuutigisinnaasatuarpullu tassaavoq taakkua piumasaqaateqarfigalugit saaffigineqassasut, Malene Lynge siunnersuivoq.
BH Air-ip nittartagaa tassaavoq bhairlines.com, tassanilu sullitanut oqarasuaat e-maililu uku nassaarineqarsinnaallutik: +359 2918 0189 aamma claims@bhairlines.com.
Aningaasammi immikkut atugassat?
Atuisoq tamatuma saniatigut nassuiaavoq, angalaniat ilaat aperisimasoq, angalanissamut nutaamut aallarfissaq qanittuararsuanngortorlu pisiarigaanni akisunerugajuttartumut immikkut aningaasartuutinut taarsiivigitittoqarsinnaanersoq.
Tamanna Atuisumit misissorneqaleruttorpoq.
Atuisartunnut siunnersorti Malene Lynge Sermitsiaq.AG-mut oqarpoq, saaffiginnissutit tamaasa akiniarsarigitik, aamma inuit nalornippat oqartussamut eqqortumut saaffiginninnerlutik.
Ilaatigut taamaaliorput Facebookimi qupperneq, matumani nassaarineqarsinnaasoq, aqqutigalugu.
Greenland Express Air pillugu allaaserisat tamaasa uani atuakkit