Atugarliorluni inuuneq
Inuit isummamikkut nappaatigalugu avissimasutut napparsimasut, inuunerisa pitsaanerulersinnissaannut qulakkeerinnittussaq tassaavoq, pilertornerusumik nappaamminnik suussusersinissaat – aamma katsorsarneqarnissaat. Taama pisoqanngippat inuunerup naleqassusia ajorsiartulersinnaavoq.
Inuit isummamikkut nappaatigalugu avissimasutut nappaateqarnerminnik suussusersisimasut,
ilungersunartorsiortuupput. Inuunerminni pisariaqartitaminnut amerlaqisutigut ilungersunartorsiortarput.
Taama nappaateqartunik angisuumik misissuinerup nutaap tamanna paasinarsisippaa, aviisi AG allappoq.
- Taama nappaateqartut amerlanersaat, 86 procentit, ilinniagaqarsimanngillat. 72 procentii suliffissaqartinneqanngillat. Aamma pingasuugaangata ataaseq imigassamik ajornartorsiuteqartartoq, misissuinermi paasisani, nakorsanut atuagassiami 'Ugeskrift for Læger'-imi allaaserisatut nutaatut ilanngunneqartumi, atuarneqarsinnaavoq.
Tamatuma saniatigut tarnikkut atukkat nungullarsaataasarput. Ilaatigut tarnimikkut napparsimasut meeqqaminnut atassuteqarunnaarsinnaasarput. Inuit isummamikkut nappaatigalugu avissimasutut nappaateqartut 16 procentii angajoqqaajupput, aamma taama nappaateqartut 41 procentiisa meeraat oqartussanit arsaarinnissutaasimallutik.
Nunat avannarliit
Taama nappaateqartut amerlanersaat angerlarsimaffittut isumaginniffiusuni aamma najugaqartarput, ilaquttaminni najugaqarnissaminnik pinngitsuuisinnaasaratik – ajornerpaamillu pisoqartillugu angerlarsimaffeqaratik inuusariaqartarlutik. Majuartarfinni imaluunniit angerlarsimaffeqanngitsut unnuisarfiini unnuisarlutik.
- Inuit isummamikkut avissimasutut nappaateqartut aningaasaqarnikkut atugarisaat, nunani allani taama nappaateqartut atugarisaannut assingupput.
– Aamma napparsimasut ikiorsiissutinik pisartut amerlassusaat, nunani avannarlerni takuneqartartunut assersuunneqarsinnaasut, nakorsat taakku marluk, Ane Storch Jakobsen aamma Michael Lynge, nakorsanut atuagassiami 'Ugeskrift for Læger'-imi misissukkaminnut atatillugu allapput.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: