Atuartut: Atuartitsineq isumaqanngilaq
Meeqqat susassaaleqisarput. Atuartitsineq assigiiaaginnarpallaartutut misigineqartarpoq. Atuartorpaalussuillu qinngasaarneqartarlutik. Misissuinermi nutaami ajornartorsiutit sammineqarput.
Ilinniartitsisut, politikerit, angajoqqaat aamma immikkut ilisimasallit atuarfimmut isumaannik akuttunngitsumik tusagaqartarpugut. Kisianni immikkut ilisimasalippiaat qanoq isumaqarpat – meeqqat?
Tamanna misissorneqarsimalerpoq.
Aviisi AG taama allappoq.
Illoqarfiit atuarfiini arfineq-pingasuni nunaqarfiillu atuarfiini qulingiluani atuartut 411-t immersugassat atorlugit misissuinermut peqataasimapput, tamatumalu inernera ilinniartitsisut inaanni, atuarfiit allaffiini kommunalbestyrelsenilu eqqarsariaallatsitsisimassaaq.
Tassami atuartitsinerup meeqqanut soqutiginarsarniarnera ilikkagassaqarnartunngortinniarneralu ajornartorsiutaasorujussuusimagunarpoq; tamanna nalunaarusiami siunissami atuarfeqarnikkut aaqqissuusseqqinnissamut politikkikkut pilersaarutinut atatillugu suliarineqarsimasumi atuarneqarsinnaavoq.
- Eqikkaasumik atuartunik isumasiuilluni misissuinermit atuarfimmi atuartitsinerup atuartunut amerlanertigut isumaqartannginnera tikkuarneqarpoq. Misissuinermit atuartitsissutit akimorlugit atuartitseriaatsit (ilusaata imarisaatalu, aaqq.) ilatsiinnarfiunera tikkuarneqarpoq. Atuartunit atuartitsinerup annikitsuinnarmik peqataatitsiffiunera misigineqartartoq, inerniliissutigineqarpoq.
Nalunaatusiaq suliarineqarsimavoq “Atuarfimmut tunngaviusumut suleqatigiissitaq”-mit, nalunaarusiarlu IMAK-ip ilaasortaanut tusarniaassutitut ittumik nassiussuuteqqammerneqarpoq.
Aqutsineq amigaatigineqarpoq
Atuartut ilaasa ilinniartitsisut tunniusimanerusut amigaatigigaat, ilinniartitsisorpaalussuit tamatuma assinganik amigaateqarput – aqutsisuminni.
Ilinniartitsisulli naapertorlugit ajornartorsiut tassaavoq pisortamik allaffissornermik sammisaqarnerunerat, taamaalillutillu siunnersuisutut suliamullu tunngasuni oqaloqatigisartakkatut suliassaminnik sumiginnaanerat.
- Ilinniartitsisut arlallit oqaatigaat naapittakkatik tassaasut allaffissornermi tunngasuni aqutsisut, perorsaanermullu tunngasuni aqutsinerup ilaginnarneqartarnera.
Misissuinerup inerniliussai marlunngorlugit allaaserineqarsimasut aviisimi AG-mi atuarsinnaavatit. Misissuinerullu sumut atorneqarnissaa paasisaqarfigalugu. Aviisi uani ataani pissarsiarisinnaavat: