Atuartut immikkut atuartinneqartut quliugaangata ataaseq soraarummeersimanermut uppernarsaateqartarpoq
Kalaallit Nunaanni tamarmi atuartut immikkut atuartinneqartut katillutik 364-it ukiuni kingullerni tallimani 10. klassimi atuarsimapput. Taakku 12 procentii fagimi ataatsimi arlalinniluunniit soraarummeernermi misilitsissimapput.
10. klassimi atuartunit immikkut atuartinneqartunit 364-iusunit 46-t fagimi ataatsimit arlalinniluunniit soraarummeernermi misilitsissimapput. Naatsumik nalunaarusiorsimanerup, Ilinniartitaanermut Aqutsisoqarfimmit saqqummiunneqarsimasup tamanna takutippaa.
Nivi Olsenip (D) meeqqat atuarfianni immikkut atuartitsinermi klassini atuartut qassit, meeqqat atuarfianni ingerlariaataasinnaasumik inaarutaasumik misilitsinnissamut innersuunneqartarnerannik takutitsisumik misissuisoqarnissaanik aalajangiiffigisassut siunnersuuteqarsimaneratigut Ilinniartitaanermut Aqutsisoqarfik nalunaarusiorsimavoq, siunnersuut siorna Inatsisartunit akuersissutigineqarpoq.
Innarluutillit peqatigiiffiannit NIIK-imit tamanna aamma paasisaqarfigineqarusussimavoq.
- Ukiuni tallimani kingullerni 10.-klassimi atuartut immikkut atuartinneqarsimasut 264-iusimapput, taakkunannga 46-t meeqqat atuarfianni fagimi ataatsimi arlalinniluunniit soraarummerlutik misilitsissimapput. Tassa immikkut atuartinnqartut 12,6 procentii, Ilinniartitaanermut Aqutsisoqarfiup nalunaarusiaani naatsumi allassimavoq.
Amerlanerpaat misilitsissimanngitsut
Atuartut immikkut atuartinneqartut sinneri 318-iusut, ukiuni tallimani kingullerni soraarummeernermi misilitsissimanngillat.
Kisitsisit takutippaat, ukiumi atuarfiusumi 2020/2021-mi atuartut immikkut atuartinneqartut ukiut tallimat matuma siorngarnit amerlanerulaartut fgagimi ataatsimi arlalinniluunniit soraarummeernermi misilitsissimasut. 2021-mi atuartut immikkut atuartinneqartut 15-it fagimi ataatsimi arlalinniluunniit misilitsissimapput, 2017-imi atuartut misilitsissimasut aqqaniliusimapput .
Ukiuni atuarfiusuni kingullerni tallimani 10. klassimi atuartut katillutik 3.445-simapput. Taakkunannga 364-it immikkut atuartinneqarsimallutik, tassa 10. klassimi atuartut 11 procentii.
Otte procentit iluarsartuussamik pilersaarusiaqartut
Nalunaarusioqqusinermi siunertarineqarpoq, 10. klassimi atuartut immikkut atuartinneqartut qassit meeqqat atuarfiannit soraarummeerlutik misilitsissimanersut erseqqissaaffigineqarnissaat. Nalunaarusiami ukiuni atuarfiusunit 2016/2017-imiit 2020/2021-mut kisitsisitigut paasissutissat ilanngunneqarsimapput.
Nivi Olsenip Inatsisartut ukiakkut ataatsimiinneranni aalajangiiffigisassattut siunnersuummini oqaatigisimavaa, atuartut immikkut atuartinneqartut amerlanerit nunami ilinniartoqarfinni assigiinngitsuni ilinniagaqalersinnaaqqullugit immikkut ittumik soraarummeersimanermut uppernarsaateqalerniassammata suliassaqarfik pitsaanerulersinneqartariaqartoq.
Ilinniartitaanermut Aqutsisoqarfiup nunami kommunit tallimaasut kisitsisaataannik misissuisimanerata takutippaa, atuartut immikkut atuartinneqartut 364-iusut otte procentii ukiuni atuarfiusuni kingullerni tallimani iluarsartuussamik pilersaarusianik naammassinnissimasut.
Tassa atuartunit immikkut atuartinneqartunit 364-iusunit katillutik 29-t iluarsartuussamik pilersaarusianik naammassinnissimasut, atuartut sinneri tamatumunnga peqataannginnissamut akuerineqarsimpput.
Innarluutillit illersuisuata Anja Hynne Nielsenip tusagassiorfitsigut nalunaaruteqarluni immikkut atuartitsinermi iliuuseqartoqartannginnera isornartorsiorsimavaa, oqaatigalugulu inatsimmi allaqqareersoq, atuartut immikkut atuartinneqartut sapinngisamik amerlanerpaat soraarummeernermi misilitsinneqarnissamut periarfissinneqartariaqartut.