Atuartunut qarasaasiat atisallu
Aasamiit Sisimiuni atuartut qarasaasianik atisanillu suliffeqarfiutilinnit Qeqqatalu Kommunianiit kajumissaaserneqalissapput
Meeqqat atuarfiannut ataqqinninnerup annertusarnissaanut atuanngitsoortarnerullu annikillisarnissaanut, Qeqqata kommunia Sisimiunilu sulisitsisut peqatigiiffiat (GE) atisaarniarfillu Anuni ukiuni tallimani atuuttussamik isumaqatigiissuteqarput.
Qeqqata Kommunia tusagassiuutinut nalunaarummi taama allappoq.
Kommuni naapertorlugu atuartut amerlavallaat inortuikulavallaarlutillu atuanngitsuukulavallaartut. Taamaammat sulisitsisuniit aasat tamaasa 7.klasse-ni atuartut pingasut qarasaasianik, Anuni-miillu 8.klasse-ni atuartut marluk atisanik INUIT Quality Clothes Of Greenland-meersunik akissarsisinneqartalissapput
- Suliffeqarfiit namminneerlutik akissarsisinneqartartussat siunnersuutigivaat tassaassasut, atuarfimminnit paarsilluarnerpaat, tassa inortuinatillu atuariartortuaannartut suliakkiutigineqartunullu tunniusimasut aammalu siuariaateqarnerminnik takutitsilluarsimasut, Qeqqata Kommunia allappoq.
Qeqqata Kommunianiit neriuutigineqarpoq aamma Maniitsumi suliffeqarfiit piffissami qanittumi assingusumik isumaqatigiissuteqarfigineqarumaartut.