Politikki
Atuartartut: Partiinut nutaanut inissaqarpoq
Nutaanik partiiliortoqarneratigut politikkikkut allannguisoqarnissaanut atuartartut akuersaartut, Sermitsiaq.AG-p nittartagaani taasititsinerup tamanna takutippaa
Politikkimi partiinut nutaanut inissaqarpoq. Sermitsiaq.AG-mi taasititsinermi peqataasimasut amerlanerussuteqartut taama isumaqarpoq.
Nalunaaqutaq 9.20 inuit 1062-it taasinermut peqataapput, taakkunanngalu amerlanerussuteqalaartut 47,3 procentit, partiit taakku inuiaqatigiinni isummat tamaasa peqataatinniarlugit pisariaqartinneqarput. Nutaanik parteeqartariaqanngitsoq 45,8 procentit isumaqarput.
Taamatut taasititsineq isumasiuinerunngitsoq naqissusissallugu pingaaruteqarpoq.
Atuaruk: Taasititsineq: Partiit nutaat pisariaqartinneqarpat?
Amerlasuut taakku partiit marluk assigiinngilluinnartut periarfissimmatigit maluginiagassaavoq. Vittus Qujaukitsup partiia, Nunatta Qitornai, aamma Michael Rosingip partiissaa tulluartuunerannik 18,9 procentit isumaqarput.
Atuaruk: Aleqap Vittup politikkia iluaraa
Taakku partiit marluk sutigut tamatigungajak akerleriittussaarpasimmata, taakku marluk politikkiannut imaanngilaq tapersiisoqartoq. Kisianni atuartartut amerlasuut qinersisartunut politikkertik saqqummiunnissaannut periarfissinneqartariaqartut isumaqarput.
22,8 procentit Michael Rosingip partiia kisimi pisariaqartinneqartoq isumaqarput. 5,6 procentit isumaqarput, Nunatta Qitornai, taamaallaat pisariaqartinneqartut.
Atuaruk: Michael Rosingip partiissaa ilusinikkiartorpoq
Tamatuma saniatigut 7 procentit partiimik allaqqinnaamik pisariaqartitsipput.
Taakku partiit nutaat marluk taasinerit 3 procentiisa missaat imaluunniit amerlanerusut pissarsiarissaneraat soorunami naggataagut qinersisartut aalajangissavaat, taakku Inatsisartuni qinigaatitaqarnissamut pisariaqartinneqarput.