Kommunimut qineqqusaarneq 2017
Atuartartut allagaat: Asii Chemnitz Narupip apeqquteqaatinnut akissutai
Kommuneqarfik Sermersuup kommunalbestyrelsianut qinigassanngortittup Nicolai J. Nissenip, Sermersuup borgmesteria Asii Chemnitz Narup (IA) aningaasaqarneq pillugu apeqquteqarfigaa. Borgmesterillu akissuteqareernerata kingorna uku akissutit tigusimasagut aaqqissuisoqarfimmiit oqallissaarutitut saqqummiuppavut.
Borgmesterip apeqquteqaatikka akimmagit atuarsimavakka. Oqartariaqarpungali borgmesteri oqariartaaseqartoq allatorluinnarlu iliuuseqartarluni.
Atuaruk: Borgmesteri: Aningaasaqarneq Nicolai Nissenip pikkoriffigisimanngilaa
Atuaruk: Apeqqutit aningaasaqarnermut tunngasut
Borgmesteri qineqqusaarnerup nalaani ileqqorissaartoqarnissaa kaammattuutigisimavaa. Taamaattorli apeqqutikka akissuteqarfigigamigit isornartorsiorpaanga naatsorsuusianik ilisimasaqannginnerarlunga.
Ilisimavara kommuneqarfiup naatsorsuusiai decembarip qaammataani saqqummiunneqarsimasut kisitsit tamakkiinngitsut.
Taama amerlatigisunik kingusinnerusukkut akiligassaqartoqarsimappat, kommunip decemberimi naatsorsorsimasaani taava kommuneqarfiup aningaasaatai ikinnerussannginnamik?
Parteeqatinnut taama aperisinnaanngilanga. Soqutigaarali kommunip ullumikkut aningaasaqarnera qanoq inissisimanersoq tusassallugu.
Borgmesterillu apeqquteqaatikka tamaasa akisimanngimmagit erseqqissaatigerusuppara.
Apeqqutigisimavara 2016-mi kommuneqarfik missingersuusiarisimasaminut paaqqinnittarfinnut sooq 6 mio koruuninik atuinngitsoorsimanersoq. Decemberimi naatsorsuisimanermut 6 mio koruunit ilanngunneqarsimanngitsut kingusinnerusukkut aatsaat akilerneqassasut borgmesteri isumaqarnerluni?
"Aningaasat atuarfinni atorneqarsimasut" borgmesterip oqaatigaa. Suut aningaasat? Atuarfeqarfinnut missingersuummi immikkoortinneqarsimasut sinnerlugit atuisimanermut, atuarfinni qarasaasiat nutaanngilisimanerinut pissutaasoq borgmesteri isumaqarnerluni?
Ilumoornerluni ukioq kingulleq qarasaasianut atortussarniarnermi atuivallaarsimaneq "taamaallaat" 15 mio koruuniunerluni immikkulli tapiliussatut aningaasaliissutaanatik?
Qarasaasianut atortussarsiniartarneq ukiunut arlalinnut pilersaarusiorneqartannginnami? Qanoq isilluni atortut qanganitserpallaarsimaneri tupaallaatigineqarsinnaangami?
2015 novemberimili qarasaasianut atortussarsiniarnermi atuivallaarsimaneq kommunip ima oqaasertalersimavaa: "Maannakkut kontumi assigiinngitsunik nalunaarsuinerit torersarneqarput. Atuinerunermut peqqutaavoq printerinik nutaanik pisisoqarsimanera, pisiniarfigisartakkanillu nutaanik isumaqatigiissusiortoqarsimanera, atuarfimmilu IT-mut tunngasunik immikkut ittunik aningaasartuuteqartoqaqqammernera aamma eqqarsaatigineqassaaq. 2015-milu paasisimavarsi aningaasaliisoqartariaqartoq? Taava qanoq isillusi 2016-imi tupinnartuliaassava?
Suliaq matoqqasumik ataatsimiinnermi suliarineqarsimanera pissutigalug allamut aperisinnaanngilanga taamaallaalli borgmesteri apeqquteqarfigisinnaallugu.
Kommuneqarfik missingersuutaasimasup qaavatigut katillugit qanoq amerlatigisunik 2016-mi qarasaasianut atortussarsiarnermi atuisimappat?