Atuartartup allagaa: Knud Chemnitzimik soraarsitsineq kukkusuuvoq

Ukioq ataaseq qaangiutilerpoq Sisorarfinni ittuusoq Knud Chemnitz ingerlaannartumik atuutilersumik suliffimminiit soraarsinneqarluni peersitaammat, ullormiillu tassanngaanniit atuutilersumik Sisorarfimmi ittuusutut akissarsiaqarunnaarsillugu. KC ukiuni 25-ni Sisorarfinni ittuuvoq, ukiuni taakkunani ullut tamarluinnaasa, sapaatip akunneri tamaasa, ukiup qaammataani ukiut tamaasa qasusuilluni Sisorarfinnut ittutut kiffartorluni. Ukiuni taakkunanissaaq Politiit Qatserisartullu pisariaqartitsilersillugit ikiuuttarsimavoq. Ukiorpassuarni atuuffimmini ataasiarluniluunniit mianersoqqussummik tigusaqarsimanngilaq.

Aamma aatuaruk: Eqqartuussut: Majuartaateqarfik 600.000 koruuninik akiliissaaq

Atorfinitsinneqarnerani inatsit toqqammaviusoq tassaavoq atorfillit pillugit inatsit, tamannalu kialluunniit eqqarsarsinnaalaartup nalunngilaa. Tassa imaappoq soraarsitsinermi peersitsinertalimmi nalorninaatsunik tunngavilersuuteqarnissaq piumasarineqassaaq.

Peersitsinermut tunngavilersuut tassaasimanerarneqarpoq innuttaasup TV-liorlutik immiussisunut siuttuusup taakku sinnerlugit pilersaarusiorsimammagu tatsip eqqaani Sisorarfiit eqqaanniittumi immiussinissaq, KC-p naliliinera malillugu isumannaallisaanikkut illersorneqarsinnaanngitsumik. Pisulli taassuma immikkuualuttortai matumani pingaarnerunngillat, qanorpiaq pisoqarsimaneranik illuatungeriit assigiinngitsunik nassuiaammata. Taamaattorli maluginiagassaavoq filmiliorniat isumaat malillugu kommunip teknikkimut avatangiisinullu immikkoortortaanit akuersissummik pisimanerarmata. Tupinnarluinnarpoq teknikkimut avatangiisinullu immikkoortortap Sisorarfiit ulluinnarni aqutsisui pisussaq pillugu attavigisimanngimmagilluunniit.

Allakkami matumani ersersikkusunnarpoq Sisorarfiit siulersuisui aamma Kommuneqarfik Sermersuup sinniisuisa isumatusaarneq akisussaassuseqarnerlu suusupagilluinnarlugit pissusilersorsimasut. Sulisitsisup kialluunniit sulisut ilaat pillugu naammagittaalliuummik tigusaqaraangami pissusissamisoortutut isigisarpaa pineqartoq tusarniaavigissallugu, taamaaliornikkut pineqartup imminut illersornissaa angujumallugu; tamannali Sisorarfiit siulersuisuisa pisariaqartutut isigisimanngilaat.

Tamatuma kinguneraa KC-p Sisorarfiit eqqartuussisunut tunniummagit, tassalu sisamanngornermi 9. marts 2017 pisoq pillugu eqqartuussisoq aalajangiivoq. KC ilimagineqareersutut pineqarnini pillugu taarsiiffigeqqummat tamakkiisumik taperserneqarpoq.

• Tupinnaannarpoq siulersuisut taama illersorneqarsinnaanngitsigisumik pissusilersormata. Sisorarfiit aninngaasaqarnerat navianartorsiortippaat imminnuinnaq eqqarsaatiginertik pingaarnerutillugu. Tamannalu Sisorarfinnut naggataagut annertuumik annaasaqaataavoq.
• Tupinnaannarpoq kommunimi aqutsisoqarfimmiut pisoq pillugu ilisimannikkaluarlutik, siulersuisut akisussaassuseqanngitsumik iliornerat qisuariarfiginngimmassuk.
• Tupinnaannarpoq kommunimut ilaasortat Poul Hansen aamma Uju Petersen, siulersuisuni ilaasortatut sinniisussatullu inissisimasut, qisuariaateqanngimmata.
• Eqqoriarsinnaavara Borgmesterip pisoq pillugu ilisimannikkaluarluni ilaqutariittut attuumassuteqarnini pillugu akuleruttussaannginnini nalunaarutigisimassagaa, taamaattumillu akuliussimasinnaanerigalua apeqquserusunngilara.

Imaassinnaavoq kommunimi aqutsisoqarfik kommunalbestyrelsimulluunniit ilaasortat periarfissaqarsimanngitsut akulerunnissaminnut. Taamaattoqarsimappat Aningaasaateqarfiup Sisorarfiit maleruagassaannik allannguinissamut pissutissaqalerpoq. Ulluinnarni aqutsisuusup atorfeqarnikkut inissisimanera soorunami kommunip HR-imut immikkoortuata ataaniissaaq. Kommunimi tassaammat Sisorarfiit aningaasaqarnikkut ingerlaannarnissaannut qulakkeerisoq.

Siulersuisut akisussaaffimmik suusupaginnissimanerat uterfigeqqissagaanni, eqqartuussinermi inerniliinermi uparuakkat ilagaat illuatungeriinnik tusarniaanerup pisimannginnerata saniatigut aamma naammagittaalliuutip tiguneraniit qisuariarumaataarpallaarsimasut. Pasitsannarpoq qangali pisimasunik isumakkeerisimannginneq taannaasoq soraarsitsinermut tunngavippiaasoq. Taassuma saniatigut eqqumiiginarpoq siulersuisunut ilaasortaannaalluni Jesper Olesen Sisorarfiit sinnerlugit sassarmat, uffa Lenn Lennert siulittaasuusoq.

Pissusissamisuussaaq klubbit assigiinngitsut Sisorarfiit siulersuisuiniititaqartut sinniisutik ingerlaannartumik tunuartillugit nutaanik taarserpatigit. Aamma siulersuisut ilaasortaaqatissamittut ivertitaat Jesper Olesen tunuartariaqaraluarpoq, imaluunniit peersitaalluni. Poul Hansen kommunimut qinersinerup kingorna isumaminik tunuassaaq.

Klubbit ilungersortumik kajumissaarusunnarput siulersuisuni ilaasortaatitamik atorfinitsitsinermut tunngasunik ilinniartittarnissaat, siunissami assinganik pisoqannginniassammat.

Malugineqassaaq Sisorarfinni siulersuisut akissarsiaqartitaammata.

Ernummatigineqarsinnaavorli siulersuisut eqqartuussinerup inernera suliareqqitassanngortikkaat, namminnermi tassunga aningaasartuutaasussat akilernaviannginnamikkit.