Atuartartoq: "RAL'i pillugu qissasiinnartariaqarpoq"

Aap, Royal Arctin Line'mut (RAL) eqqartueqqinneruvoq, umiarsuaatileqatigiiffiullu nassiussanik piffissaq eqqorlugu apussisinnaannginnera.

Ilungersuumminartoq

Allakkamilu ernerata aaqqissuisoqarfimmut nassiussimasaani ilungersuummeqqanera paasinarpoq. Taanna kinaassutsiminik isertuusseruppoq, aaqqissuisoqarfimmiillu atia ilisimavarput.

Anaanaq 81-nik ukiulik aprilip qaammataani 2017-imi panini tikeraartoralugu qerisunik kalaaliminernillu poortuivoq nassiullugillu.

Nassiussat ullut qulit qaangiunnerini Danmarkimut apuuttussaanerit, nassiussinerini allagartaani allassimavoq. Nassiussalli Danmarkimut tikiffissaraluisa sapaatip-akunneri pingasut qaangiunnerini paniata RAL attaveqarfigisimavaa tikinnissaannulli isumaqatigiittoqarluni.

Nassiussallu RAL'ip sulisuinit apuunneqarnissaanni taanna suliffimminiit sulinngiffeqartariaqarsimavoq. Taakkuli takkutinngisaannarsimapput.

Qerisut puiorneqartut

Taanna RAL'imut sianerput, taakkuli paasissutissiaraat nassiussalerisut qerisut tiguniarlugit puiorsimagaat.

Sunaaffa nassiussai sumut inissinneqarsimaneri naluleraat / tammaagaat. Aatsaallu inatsisilerisumik ikiortiserinninnialermat, qaammatit 2,5 qaangiutillarmata aggiunneqarlutik. Tassanilu neriorsorneqarpoq tulliani nassiussarsileruni Ålborgimiit najugaanut Sønderjyllandimut assartornissai RAL'ip isumagiumaarai.

Nerisassat 17 kilo

Anaanaq Ilulissani najugaqartoq, meeqqani kalaaliminernik isumagerusullugit kalaalimineerniarfinni pisiniallataasarsimavoq.

Katillugit 17 kilo katersarisimavai, taakkuli najukkami RAL'ip nassiussalerivianut utertinnerani umiarsuaatileqatigiiffik ajornartorsiumminik aaqqiisimanersoq mianersortumik apeqqutigaa. Nassiussat 12. september apuunneqartussaasimasut.

Ulloq taanna paniata RAL'i attaveqafigaa, tassani paasitinneqarluni nassiussat apuunneqarnissaat kissaatiginguniuk 520 koruunit akilertariaqarai. Nassiussallu sukkanerusumik apuunneqarnissaat perusullugu uppernarsaatip assiga ulloq taanna nassiuppaa.

Sapaatip-akunnerani utaqqivoq. Track and trace'lu atorsinnaasimanngilaq. Sapaatip-akunnerini tulliuttuni taanna arlaleriarluni sianertarsimavoq oqarfigineqartarlunilu:

- Nååå, suu sianerfigijumaarpatsigit.

Destrueret i Nuuk

Sapaatip-akunnerata missaa qaangiummat paasitinneqarput, qerisut kukkusumik Nuummut niuneqarsimasut, sapaatip-akunneralu 40-mi umiarsuarmik nassiunneqarumaartut.

Sapaatip-akunnera 40-p naalernerani RAL'imit attavigineqarpoq, tassani qerisuutai kukkusumik Nuummi niuneqarsimasut aassimammata RAL'p ingittariaqarsimangai oqaatigineqarluni. Umiarsuaatileqatigiiffiup taassuma annaasanik immersugassaanik nassikkumavaa.

Pingajuattut misigisaq ilaqutariinnut ilungersortitsisoq tassaavoq Nunatta iluani nassiussalerineq, tassani nassiussat Nanortalimmiit Nuummut nassiunneqarneri qaammatini sisamani ingerlasimavoq.

- Aserorneqarsimasunik taarsiivigitinniarnermi suliaq qaammatini arfineq-marlunni utaqqineqartariaqarsimasoq, qisuariarnissaat RAL-ip utaqqineqarluni, erneq Sermitsiaq.AG-mut nassuiaavoq.

Ilungersunartorsioqarluni aperivoq:

- Qaqugu naammagilerneqassava? Oqartoqarlunilu tassa ? RAL'ip akisussaaffik kivissinnaanngilaa, taavami kiap?

Pitsaassutsimik uuttornaaneq kingulleq

Pitsaassutsimik uuttortaaneq, umiarsuaatileqatigiiffiup ippassaq ataasinngornermi saqqummiussaani, umiarsuaatileqatigiiffik sapaatip-akunnera 40-mi containerit arfinillit kukkusumik suliarisimagai allassimavoq. Tamanna sapaatip-akunnerata siulianut sanilliunnerani marloriaataavoq.

Umiarsuaatileqatigiiffiup arlaleriarluni utoqqatsissutigisimavaa, upernaaq it-systemimik atuutsisilernermigut piffissaq eqqorlugu apuussisarnerminik unammilligassaqarnera.