Atuarnerup aallartilernera angajoqqaat ernumagaat

Sisimiuni meeqqat atuarfianni ataasinngorpat atuartitsinerit aallartinnissaat angajoqqaanut ernumanarput. Tunillaassuuttoqarnerulernissaa ernumagineqarpoq.

Oline I. Olsenip pania Naja Katinka aanaanilu Julia. Naja Katinka ukioq manna 1. klassemi atualissaaq.

Atualernissaq kinguartilli. Nittartakkakkut atsioqattaartitsineq taama qulequtaqartoq angajoqqaanit 140-nit atsiorneqarsimavoq. Atualernerup aallartinnissaata kinguarteqqinneqarnissaanut kissaateqarnermik ilallugu atsiornerit Qeqqata Kommunianut ullaaq manna nassiunneqarput.

Oline I. Olsen atsiornernik katersinermik aallartitsisuuvoq. Atsiortitseqattaarnerit ulloq ataaseq ingerlassimavai. Nammineerluni paneqarpoq Minngortuunnguup Atuarfiani 1.B-tut ataasinngornermi 16. august atualertussamik.

- Sisimiuni pissutsit taamaatsillugit toqqissisimananngiivippoq. Tunillaassuunneq aqunneqartutut isikkoqanngilaq, kommunimilu tunillatsissimasut katillugit 74-iupput. Naluarput tunillaassuunneq suminngaanniit aallartinnersoq, Oline I. Olsen Sermitsiaq.AG-mut oqarpoq.

Qeqqata Kommuniata atualertitsinissamut pilersaarutaa atuarsimavaa, tunillaassuuttoqarnissaali suli ernumagalugu.

- Ersarissumik oqaatigineqanngilaq Sisimiuni tunillaassuunneq qanoq siaruarnersoq, oqarpoq.

Illoqarfimmi killilersuuterpassuit

Oline I. Olsen oqaluttuarpoq sapaatit akunneri marlussuit ilaquttanilu allanut akulerunnaveersaarsimallutik. Oline kisimiilluni niuerniartarpoq, meeraalu ikinngutiminnik ataasiinnarmik ulluinnarni ilagisaqartarlutik. Angerlarsimanerusarput, pisuttuassatillutillu allanut qanillinaveersaartarlutik.

Meeqqerivinni tunillaassuuttoqarsinnaanera pillugu meeqqeriviit matuneqartarsimapput. Atuarfiillu ammarneqarpata tunillaassuuttoqalernissaa ernumagaa.

- Atualeqqaartoornissaq toqqissisimananngilluinnartoq ornipparput. Coronaqarfiusuni ulluinnaat nalinginnaasuunngillat, aamma meeqqat atualeraluarpataluunniit. Taamaattumik kissaatigaara pissutsit oqartussanit nakkutigineqaqqaartariaqartut, atualersitsinissarlu kinguartinneqassasoq, oqarpoq.

Sisimiuni killilersuutit arlallit 24. august tungaanut atuutsinneqarput. Inuit katersuussinnaasut amerlanerpaamik 20-iussapput. Pisortat illutaanni allanilu qanermut assiaqutit atorneqassapput. Tamakkiisumillu akiuussutissalertissimanngitsut angalaqqusaanngillat neriniartarfinneeqqusaanatillu. Nakorsiartoqassatillugu nakorsiartussaq ulloq sioqqullugu coronamut misissorteqqaarsimasariaqarpoq. Qeqqata Kommuniatalu allaffia tallimanngorneq 13. august tikillugu ornigulluni saaffiginnittunut matoqqasimalluni.

Kinguartinneqareersimasoq

Sisimiuni ilinniarnertuunngorniarfik siusissukkut nalunaaruteqarsimavoq ilinniartut atualeqqinnissaat 24. augustimut kinguartinneqartoq. Taama kinguartitsineq meeqqat atuarfiannut Oline I. Olsenip aamma atuutsikkusukkaluarpaa.

Sisimiuni meeqqat atuarfii pilersaarutit siulliit malillugit 9. august aallartittussaagaluarpoq. Tunillaassuuttoqarnerali pissutigalugu tamanna kinguartinneqarsimalluni. Ulloq atualerfissaagaluartoq, 9. august malunnartinniarlugu Oline I. Olsen inoqutinilu malunnartitsisimapput. Ullormi tassani pania atualeqqaartussaq kalaallisoorngaartinneqarpoq tunissutisillunilu. Ilaqutariillu nerilluaqatigiissimallutik.

- Toqqissisimanngiivikkuma paniga aqagu atuariartortissanagu eqqarsarpunga, Oline I. Olsen oqarpoq.

Powered by Labrador CMS