Atuarfiup sanaartorneqarnissaanut neqeroorutit akii assigiinngitsorujussuit
Danmarkimi entreprenørselskabit anginersaat marluk, Aarsleff aamma MT Højgaard, Nuup qeqqani Kalaallit Nunaanni atuarfiit annersassaannik sanaartornissaq sorsuutigaat. Suliarinnittussarsiuussinermili akigititassatut neqeroorutigineqartut assigiinngitsupilussuupput. Akigititassatut neqeroorutit 150 millioner koruuninik nikingassuteqarput.
Danmarkimi ingerlatseqatigiiffiit sanaartugassanik suliarinnittartut annersaasa marluk Aarsleff aamma MT Højgaardip Kalaallit Nunaanni atuarfiit annersaat Nuup qeqqani sanaartornissaanut unammipput.
Aarsleffip islandimi suliffeqarfia Istak atuarfimmik suliniuterujussuarmut suliarinninnissamut 700 millionit koruunit ataatilaarlugit Siorarsiorfik-Nuuk City (NCD) Developmentimut neqerooruteqartoq, MT Højgaard 550 millionit koruuninik neqeroorpoq. Sermitsiaq.AG taama paasisaqarpoq.
Akit momsi ilanngunnagu akiupput. Kisianni akit neqeroorutigineqartut siullermik pituttuisuunngillat. Ingerlatseqatigiiffiit sanaartugassanik suliarinnittartut isumaqatiginninniaqqittussaallutik nalunngilaat. Sapaatip-akunnerini tulliuttuni neqeroorutit naliliisartunit ataatsimiititaliamit atuaqqissaarneqassapput, tasani politikerit, atuisut, NCD, sanaartornermut siunnersortit aamma suliami susassaqartut allat.
Isumaqatiginninniarnissami aggersumi sanaartugassanik suliarinnittartut sanaartortitsisumut NCD-mut isumaqatiginninniarnerup kingorna, sanaartortitsisup inaarutaasumik suliniut aamma sanaartortussat toqqannginnerini iluarsisamik neqeroorusiornissamut periarfissaqarput.
NCD-mi pisortap, Jens Frederiksenip, tamanna Sermitsiaq.AG-mut siornatigut ilisimatitsissutigereerpaa.
Akia kingusinnerusukkut
Akissaa novembarip naanerani tunniunneqassaaq. Kisianni Istakip aamma MT Højgaardip neqeroorutaat kingulleq tamarmik 600 millionit koruuniusinnaavoq, tusarfik taama oqarpoq.
Isumaqatiginninnerit naammassitinnagit, atuarfimmik suliniutip qanoq akeqarnissaa ilisimaneqanngilaq. Pisortaq Jens Frederiksen suleqatinilu aalajangiissapput. Nuuk City Developmentiip sanaartugassanik suliarinnittartut MT Højgaard aamma Aarsleff kimigiiserfiginiassavai – taamaalillunilu atuarfimmut suliniummut akigitinneqartussaq aallaqqaammut neqeroorutaasunut appartinneqarniassalluni.
Nuuk City Development aamma Kommuneqarfik Sermersuumi kommunalbestyrelsi 2030-ip tungaanut, inissianik, paaqqinnittarfinnik aamma atuarfinnik Nuummi 4-5 milliardinut sanaartortoqarnissaa takorloorpaat.
Pisortap Jens B. Frederiksenip siornatigut Sermitsiamut nalilernikuuaa, Nuummi atuarfissaq 480 aamma 580 millionit koruuneqassasoq, taanna Nuummi Blok P-p inissisimaffigisimasaata missaani inissisimassaaq. Suliniut katillugu 18.000 kvadratmeterinik angisuseqassaaq. Atuarfiup saniataigut suliniut aamma paaqqinnittarfimmik angisuumik ilaqarpoq, aammalu atuanngiffeqarnermi ornittagaqasalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...