Atuarfiup pisortaa: Tupaallaatiginngilara
Atuarfik Ukaliusaq sapaatip-akunnerata siuliani coronamik eqqugaavoq, tassani atuarfiup pisortaa Karno Lynge, angajoqqaat oqartussallu attaveqarfiginiarlugit ulappuserpoq. Pisoq siusinnerusukkut kingusinnerusukkulluunniit takkuttussaavoq, taanna oqarpoq.
- Misiliutaasinnaanerput nuannaarutigiinnarpara.
Karno Lyngep eqqissisimasumik misigissutsinillu aqutsisinnaasumik, atuarfimi Atuarfik Ukaliusap imaluunniit inuit oqartarnerat malillugu USK-ip, coronamik eqqugaanerani ulloq qanoq misigisimanerlugu oqaluttuarpoq.
Aviisi AG taama allappoq.
- Tamanna siusinnerusukkut kingusinnerusukkulluunniit takkuttussaavoq. Klassitsinni tunillatsittoqarnissaa ilimanarsinnaasoq ilinniartitsisut oqaluunnikuuakka. Maanna eqqarsaatit iliuusinngortillugit misilippavut, Karno Lynge oqarpoq.
Ukiorpassuarni atuarfimmi pisortaq sapaati- akunnerata siuliani pingasunngornermi ullaakkut angajoqqaamit attaveqarfigineqarpoq, taassuma atuartoq coronamik tunillatsissimasoq tusarsimavaa. Kisianni taanna atuartumut pineqartumut attuumassuteqanngimmat Karno Lynge iliuuseqarsinnaananilu aalajangersimasumik iliuuseqarnianngilaq.
- Tusatsiakkat tunuliaqutaralugit iliuuseqarsinnaanngilanga, taanna oqarpoq.
Arfineq-pingasulli qaangilaarnerani oqarasuaat sianermat iliuuseqarsinnaanngorpoq. Maannami atuartut ilaata arnaa nalunaaruteqarpoq, meerartik COVID-19-imik tunillatsissimasoq. Atuartoq taanna paaqqinnittarfimmi Timmiaaqqaniittartup aamma tunillatsissimasup qatanngutigaa.
- Soorunami ingerlaannaq iliuuseqarfigaarput aqutsisoqarfillu attaveqarfigalugu. Allakkamik allagaqarpugut, atuartullu angerlartinneqartut oqaluttuarluta angajoqqaanut tamanut sianeqattaarpugut, Karno Lynge oqarpoq.
Aviisimi AG-mi atuarnerusinnaavutit. Aviisi uani pissarsiariuk: