Atuarfiup oqoqarnera angajoqqaat tujormigigaat
Maniitsumi meeqqat atuarfiata, Kilaaseeqqap Atuarfia, oquiarneqarnissaa sukkanerusinnaanngilaq, Maniitsumi angajoqqaat taama isumaqarput. Aserfallassimasunik suliaqarneq aallartereersoq, Qeqqata Kommunia ilisimatitsivoq.
Kilaaseeqqap Atuarfiani init atuartitsiviusut arfinillit oqummik eqqorneqarsimammata matuneqarallarsimapput.
Atuarfiup ilaa matuneqartoq pukkinneruvoq, qalialu oqoqalersimasoq misissuinernit paasineqarsimalluni. Oquiaalluni suliaqarneq aallartinneqareersimasoq, ukiamullu naammassissasoq naatsorsuutigineqartoq, Maniitsumi Qeqqata Kommuniani ilinniartitaanermut pisortaq ilisimatitsivoq.
Atuartut angajoqqaavisa ernumagaat oqoqarnera meeqqanut peqqinnarnavianngitsoq.
Ukioq atuarfiusoq 2022/2023 29. august aallartippat, atuartut atuariartortinnissaat toqqissisimanannginnerarlugu, angajoqqaat sinnerlugit angajoqqaat marluk, Nikolanguak Lyberth aamma Elisabeth Larsen ammasumik allagaqarlutik ilisimatitsipput. Allagaq Qeqqata Kommuniani borgmesterimut Malik Berthelsenimut, MIO-mut, Maniitsumi atuarfiup sinniisaanut Ilinniartitaanermullu Naalakkersuisumut Peter Olsenimut ingerlateqqinneqarsimavoq.
Suliareqqiinissaq pisariaqartoq
Kilaaseeqqap Atuarfiani sinniisut kaammattuineratigut atuartitsiviit silaannaata qanoq issusianik misissuisoqarsimavoq. Iluarsaassinermullu pilersaarutit kommunalbestyrelsemut ilisimatitsissutigineqareersimasut, ataatsimiinnernit imaqarnilianit arlalinni atuarneqarsinnaapput.
Maniitsumi ilinniartitaanermut pisortaq, Anna Heilmann Sermitsiaq.AG-mut ilisimatitsivoq init atuartitsiviusut arfinillit matuneqarsimasut. Atuartitsiviit specialklassertunit atuartitsiffiusarput. Taakkulu inissaqartinniarlugit kommuni ininik allanik attartorsimavoq. Atuartitsineq 29. august aallartitsinnagu angajoqqaat aamma ataatsimiigiartinneqarumaartut, ilinniartitaanermut pisortaq ilisimatitsivoq.
Kommunalbestyrelse 3. juni ataatsimiisinneqarami ilisimatinneqarsimavoq iluarsartuutassat tamakkerlugit naammassiniarneqarsinnaasut ukiut marluk pingasulluunniit ingerlaneranni. Ilinniartitaanermut pisortaq, Anna Heilmann ilisimatitsivoq siulliullugu iluarsartuunneqartut, tassa init atuartitsiviusut, ukiamut naammassisimalerunik ammarneqarumaartut.
Akiligassaq suli utaqqineqarpoq
Kommunalbestyrelsep ataatsimiinneranit imaqarniliat ilaanni ilisimatitsissutigineqarpoq Atuarfik Kilaaseeqqap iluarsartuunneranut aningaasanut missingersuutit 2018-2024 atuuttut naapertorlugit katillugit 71,1 milliuunit koruunit illikartinneqarsimasut. Iluarsartuussinissaq tamakkerlugu suli pilersaarusiorneqarsimanngilaq, aningaasallu illuartinneqarsimasut missingersuutitut isigineqassallutik.
Init oqoqalersimasut iluarsartuunnerisa saniatigut matut ikuallattoqarneranilu matut atortussat taarsersorneqartut, eqaarsaartarfillu nutarsarneqartoq, ataatsimiinnermi imaqarniliami ilisimatitsissutigineqarpoq. Silaannarissarfiit aamma taarsersorneqassapput.
- Piujuartitsineq malinneqarluni atuarfimmi atuartut sulisullu pitsaanerusumik avatangiiseqalernissaannik suliniutaavoq. Illut oqorsaataat iluarsaassinermi issunerulersinneqassapput, illuutillu piumasaqaatinik malinnittussanngorlugu iluarsartuunneqassalluni, imaqarniliami allassimavoq.