Tununi internetsimut attaviit qaammataasiatigoorput, kitaanilu attavinnut immap naqqatigut kabelikkut internetseqarfiusumut sanilliullugu arriinneroqaaq.

Kommuneqarfik Sermersooq Tusassilu suleqatigiillugit Tasiilami meeqqat atuarfianni internetsimut attaveqaat pitsanngortippaat, sukkassuseq 20 mbit-imiit 100 mbit-imut qaffallugu. Tusass tusagassiutinut taama nalunaaruteqarpoq.

Kommuneqarfik Sermersuup borgmesteria Avaaraq Olsen oqarpoq ullutsinni atuartitsinermut internet ilaasorujussuusoq, Tasiilamilu atuartut maanna Nuummi atuartut assigalugit internetsersinnaalernerat siuariarneruvoq annertooq:

20+40+40

- Tamatuma kingunerissavaa atuartut iPaditik atorlugit atuartut allat assigalugit paasissutissanik internetikkut ujaasisinnaalernerinik. Kommuneqarfik Sermersuup taamatut Tusassimik suleqateqarluni periarfissaqalersitsinera nuannaarutigeqaara, borgmesteri oqarpoq.

Suleqatigiinneq ima pisivoq Kommuneqarfik Sermersuup Tusassimut pisiarisartakkami ilaa atunngisani 40 mbit atuarfimmut tunniummagu, taamaaqataalu, tassa 40 mbit, Tusassip aamma tunniullugu. Atuarfiup nammineerluni 20 mbit pigereerpaa.
- Tamanna immaqa kabeli aqqutigalugu attaveqaatilinnut naleqqiullugu annertugisassaarpalunngikkaluarpoq, kisianni tassa nunarsuup avannaarsuani piterartartumi pinngortitamilu peqqarniissinnaasumi pitsanngoriaat tamanna annertoorujussuuvoq, Tusass allappoq.

Periarfissanik nutaanik pilersitsineq nuannaarutigaat

Tusassip Kommuneqarfik Sermersuumik suleqateqarnera nuannaarutigisorujussuugitsik Tusassip siulersuisuini siulittaasup Ulrik Blidorfip naqissuserpaa.

- Naak nalunaarasuartaateqarnikkut attaveqaasersuutinik aningaasarpassuarnik nalilinnik pinngortitami imaannaanngitsumi inukitsumilu sanaartoraluarluta uagutsinnut isumaqangaarpoq suleqatigiinnikkut pitsaanerusunik periarfissaqalersitsisinnaagatta. Tamanna maanna Tasiilamut atuuppoq. Nuannaarutigaarput ataatsimoorluta periarfissanik pitsaanerusunik kinguaariinnut tullernut pilersitseqatigiikkatta nunarsuarmillu qaninnerulersitsilluta, tamannami Tusassimi periusissiatsinni ersarissumik anguniagaraarput, Ulrik Blidorf oqarpoq.

Isumaqatigiissut borgmesterimit siulersuisuinilu siulittaasumit, Tasiilami inuussutissarsiorneq pillugu ataatsimiinnermut sisamanngornermi tallimanngornermilu ingerlanneqartumi, atatillugu saqqummiunneqarpoq.