Nuummi atuarfimmik atuartunik 1200-nik atuartoqarsinnaasumik sanaatorneq inaarsarneqaleruttorpoq.

Atuarfik 2024-imi piariissaaq, paaqqinnittarfillu meeqqanut 96-inik inissaqartoq ukioq manna atulissasoq naatsorsuutigineqarpoq.

Paaqqinnittarfik nutaaq ammarpat paaqqinnittarfinnik pioreersunik matusisoqassanngilaq. Kisianni atuarfissuup nutaap meeqqat atuarfii marluk Atuarfik Ukaliusaq (USK) aamma Atuarfik Samuel Kleinschmidt (ASK), iluarsartuunneqarnissaasa akisuallaarneranik nalilerneqarsimasut taarsissavai, taamaattumillu kommuni taamanikkut atuarfimmik nutaamik Nuup qeqqani sanaartorniarluni aalajangerpoq.

Atuarfiup paaqqinnittarfiullu ingerlanneqarnissaanut tunngatillugu ingerlasoqarpoq, kommunip atorfimmut inuttassarsiorluni allagartaliivoq, skoleinspektørimik aamma paaqqinnittarfimmi pisortamik pissarsiorluni, februaarimi imaluunniit marsimi atorfinitsitsisoqarnissaa naatsorsuutigineqarpoq.

Aqutsisunik atorfinitsitsineq piffissaalluartillugu pissaaq

Ingerlatsivik Meeqqanut Atuarfeqarnermullu Ataatsimiititaliamut taama ilisimatitsissuteqarpoq:

- Meeqqerivimmi atuarfimmilu aqutsisunik atorfinitsitsinerup piffissaalluarallartillugu pinissaa pingaaruteqarpoq, taamaasillutik aqutsisunngortussat sulisunik atorfinitsitsinissat tungaanut piareersaaqataaniassammata naleqartitanik anguniakkanillu suliaqarnissaminnut ininillu aaqqissuussiniassammata, paasissutissiinermi taama allaqqasoqarpoq.

Atuarfiillu taakku kattunneqarnissaat 2021-p naaneranili aallartissimasoq, ataatsimiititaliaq ilisimatinneqarpoq, tamatumani suliffeqarfinni assigiinngitsuni sulisut suleqatissaminnik ilisarisimanninnerulernissaat aammalu sulinermi ataatsimoortumik ileqqussaminnik nutaanik pilersitsinissaat anguniarlugu.

Atuarfik nutaaq inissaqarnerusumik sananeqarpoq, siunissami Nuummi atuartut amerliartornissaat ilutigitinniarlugu. Tassa imaappoq, atuarfik aallaqqaammut 950-t missaannik atuartoqarluni, kisiannili ungasinnerusoq eqqarsaatigalugu atuartunut 1.200-nut inissaqassaaq.

Savalimmiunit Danmarkimiillu isumassarsiortoqartoq

- Atuarfissuaq pineqarmat, aqutsisoqarnerup tungaanut atuarfik qanoq aaqqissuussaassanersoq sukumiisumik eqqarsaatersuutigineqartariaqarsimavoq. Taamaattumik Meeqqanut Atuarfeqarnermullu Ingerlatsiviup IMAK ataavartumik oqaloqatigisarpaa, aammalu Danmarkimi Savalimmiunilu atuarfinni angisuuni suleqateqarnermigut isumassarsiortarlunilu misilittakkanik pissarsiniartarluni, paasissutissiinermi allaqqavoq.

Atuarfik nutaaq ukiumi kingullermi kommunip aningaasaqarnerani tukattoqarneranut qitiusumik inissisimavoq, tassani ingerlatsiviup kukkunersiorneqarnerani, kommuni atuarfimmut akissaqanngitsoq inerniliunneqarpoq, naak sanaartorneq ingerlangaatsiareeraluartoq. Kommunili decembarimi 1,2 milliardit koruuninik taarsigassarsinissamut akuerineqarpoq, taakkunannga 750 millionit koruunit atuarfiup paaqqinnittarfiullu nutaat akilerneqarnerinut atorneqassallutik, taamaalillunilu aningaasartalerneqarnera inissinneqarpoq.

Nutaarsiassat

Kommunip paaqqinnittarfiini atuarfiup kingorna ornittakkanilu sulisut pikkorissartut

Nuummi paaqqinnittarfinni kiisalu atuarfiup kingorna ornittakkani sulisut ilinniagaqarsimanngitsut piginnaanngorsaqqinneqarnertik sapaatit akunnerisa qulinganni aallartippaat....

Innuttaasunik suliffeqarfinnillu sullissineq pitsaanerusoq

Qatserisartut Sermersuup innuttaasut suliffeqarfiillu  ajornannginnerusumik upalungaarsimasunut attaveqartarnissaat kissaatigivaa.

Nalinginnaasunik apeqqutissaqaruit imaluunniit...