Atuarfissarsuarmi atuartoqalernissaa ukiumik ataatsimik kinguartinneqartoq
Atuarfik Nuummi atuarfinnut ASK-imut USK-imullu taartaasussaq 2024-mi aasakkut atunngiffeqareernermi aatsaat atorneqalissaaq.
Nuup qeqqani atuarfissap atuartunut 1200-nut inissaqartitsisussap sanaartorneqarnera, coronap nunarsuarmi tuniluunnerata malitsigisaanik sanasumut Ístak-imut assigiinngitsutigut unammillernartoqartitsisimasumut kinguaattoortitsisimavoq.
Siorarsiorfik – Nuuk City Development A/S (NCD), Kommuneqarfik Sermersuup illoqarfimmik ineriartortitsinermi ingerlatseqatigiiffiutaa taamatut ilisimatitsissuteqarpoq.
Pilersaarutaaqqaartut malillugit meeqqat atuarfiat 2023-mi aasaanerani atuanngiffeqareernerup kingorna atorneqalertussaagaluarpoq, kisianni taanna aatsaat 2024-mi aasaanerani atuanngiffeqareernerup kingorna piariissaaq.
- Meeqqat atuarfiata aasaanerani atuanngiffeqareernerup kingorna atorneqalernissaa, NCD-imut aamma Kommuneqarfik Sermersuumut pingaaruteqarsimavoq, tassami tamatumani atuartut Ukaliusameersut (USK) aamma Atuarfik Samuel Kleinschmidt-imeersut (ASK) atuartitsineq akornuserneqarani nuussinnaalissammata, NCD nalunaaruteqarluni allappoq.
Tunniussinissaq ukiumik ataaseqqissaamik kinguartinneqanngitsoq
Direktør i NCD-mi pisortap Jens B. Frederiksenip Sermitsiaq.AG-mut oqaatigaa, kinguartitsinermut ajornartorsiutaasimasut arlallit nunarsuarmi tuniluuttoqarneranut attuumassutillit pissutaasut:
- Tuniluuttoqarnerani pissutsit assigiinngitsorpassuit ukiut kingulliit marluk ingerlaneranni unammillernartoqartitsisimapput.
Jens B. Frederiksenip erseqqissaassutigaa, atuarfiup atorneqalernissaanik kinguartitsinermi, piffissaq sanaartukkamik tunniussiffissaasoq ukiumik ataaseqqissaamik kinguartinneqarsimanngitsoq.
Ulluunerani paaqqinnittarfissaq piareerneqassasoq
- Sanaartugaq meeqqanit sulisunillu iserfigineqannginnerani misissorneqarnissaanut aamma piffissaqarfigisussaavarput.
- Kommunalbestyrelsip kinguartitsinissaq aamma akuerisimavaa, tamatumunngalu pissutaavoq atuarfiiat allat marluk matuneqartussaanerat, atuarfiullu atorneqalernissaanut tunngatillugu kommuni annertuumik suliassaqarluni, Jens B. Frederiksen oqarpoq.
NCD naapertorlugu, ulluunerani paaqqinnittarfissaq sanaartukkamut atasoq meeqqanut 130-t missaanniittunut inissaqartitsisoq 2023-p qiteqqunnerata missaani piareersimassaaq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...