GUX
Atuarfimmi skemami qilaatersorneq ilaasoq
Sisimiuni GUX-imi ulluni makkunani kulturikkut kingornussassat qitiutinneqarput
Sisimiuni GUX-mi allaatit qarasaasiallu angallattakkat ulluni makkunani qilaatinik taarserneqarput.
Kulturilerinermi ilinniartut ukiup aappassaaneertut qilaatersorneq inngernerlu immikkut sammissallugit aalajangiussimavaat. Inngertartut Leif Immanuelsen aamma Nuka Alice Lund ilinniartunut inngernermik misiliisitsipput. Qilaammillu misilittakkatik aamma oqaluttuaraat.
- Kulturitsinnik kingornussisussaatitaaneq eriagisariaqartutullu isigisatsinnik inuusuttatsinnut apuutaqarnissarput pingaartutut isigaara, Leif Immanuelsen oqarpoq.
Kinaassutsimut isumaqartut
Tamannalu ilinniartunut pissarsiaqarfiulluarpoq.
- Qilaammik sammisaqarneq assut uannut pissarsinarpoq. Kalaallit siulitta qanoq qaqugukkullu atortarsimagaat paasisaqarfigeqaarput. Siornatigut inngertut tusaannartarnikuullugit, massakkulli tunuliaqutaasa qanorlu aaqqissuussaasimatigisoq paasineri uannut kinaassutsinnullu isumaqaqaat. Ukiup aappassaani GUX-imi ilinniartoq Jakobine Kreutzmann oqarpoq.
- Uagummi inuiaat Kalaallit anersaarput, pigisagut eriaginerusariaqarpagut qaqugumorsuaq oqaluttuarisaanermut ilaajuartikkumallugit, ukiup pingajussaani ilinniartoq Lene Petersen oqarpoq.
Sammisaqartitsineq aqagu atuarfiup aulaani naammassineqassaaq, tassani ilinniartut namminneq qilaatitik takutillugillu inngerniarput.