Atuarfimmi siulersuisut: Ilinniartitsisut amigaataanerat meeqqatta ilikkarnissaannut sunniuteqarnerluppoq
Meeqqat atuarfianni ilinniartitsisussaaleqisoqartarnera ilikkarniarnermut iluaqutaanavianngilaq. Atuarfimmi siulersuisuni angajoqqaat sinniisaasa atuartut ilikkagassaraluaminnik annaasaqartarnerat ernumagaat, qanoq iliuusissaaleqillutilli.
Ilinniartitsisut arlallit piffissap sivikitsuinnarmi soraarpata, atuartitsineq sunnerneqassaaq. Atuarfimmi siulersuisuni angajoqqaat sinniisaasa meeqqat atuarnerannut sunniuteqartarnera malugisimalluarpaat.
- Ukiuni atuarfiusuni kingullerni meeqqatta atuartinneqarnerat naammaginarsimanngilaq. Ilinniartitsisut pikkorissut taama amerlatigisut soraajortornerat ernumanarpoq, atuarfimmi siulersuisuni siulittaasoq Britta Nielsen oqarpoq.
Taanna Atuarfik Hans Lyngemi angajullerni atuartuuteqarpoq.
Taassuma oqaatigaa ilinniartitsisunik amigaateqarneq pillugu angajoqqaat ernummateqarnerat, atuarfimmi pisortanik ataatsimeeqateqarnerni arlaleriarlutik oqaatigisarsimagitsik.
- Ilinniartitsisut Atuarfik Hans Lyngemiit soraararneranni angajoqqaat ernummateqarnerat arlaleriarluta pisortanut qaqittarparput. Nukiit ilisimasallu arlallit annaasarpagut, ilinniartitsisoq soraaraangat, atuarfimmi siulersuisuni siulittaasoq oqarpoq.
Aaqqiissutissanik suleqataarusuppugut
Britta Nielsen ilisimatitsivoq atuarfimmi sulinermut atatillugu misissuititsinermi atuarfimmi siulersuisut peqataasimasut. Atuarfilli suli ilinniartitsissussaaleqinera ernumagineqarpoq.
- Akunnerit atuartitsiviusut naammassiniarlugit ilinniartitsisut ilaat akunnerni amerlanerusuni sulisariaqartarput. Taamaakkaluartoq taama inissisimasoqarnera atuartuutitta angusaannut pitsaanngitsumik sunniuteqarsinnaasoq ernumagaarput, oqarpoq.
Kaagimi pinnersaataannaanerpugut
Britta Nielsen naapertorlugu atuarfiup siulersuisui kommunalbestyrelsemik imaluunniit atuarfeqarnermut ataatsimiititaliamik ataatsimeeqateqarusuttarsimagaluarput. Ataatsimiinnissalli inissinnissaanut piumasaqarneq atuarfimmi pisortaqarfimmit suli qisuariarfigineqarsimanngilaq. Atuarfimmi pisortat atuarfimmi pissutsit pillugit tusagassiorfinnut oqaaseqarumanngillat.
- Ataatsimeeqateqarusukkaluarpugut ajornartorsiutit aaqqiissuteqarfigerusullugit. Ilisimavara atuarfimmi pisortaq ilungersorluinnartoq pitsaanerpaamik atugaqartitsiniarluni. Aaqqiissutissanillu aamma uagut suleqataarusuppugut. Ilaannili misiginarsisoornartarpoq atuarfimmi siulersuisut kaagini pinnersaataannartut inissisimasut, Britta Nielsen oqarpoq.
Atuarfik Hans Lyngemi atuarfiup siulersuisuini angajoqqaat sinniisaannik oktoberimi qinersisoqassaaq. Angajoqqaat sinniisui marluinnaat maanna issiapput, pingasunillu ilasariaqarlutik.