Atuarfimmi Nuummiittumi meeqqat akornanni tuniluuttoqartoq
Klassimi ataatsimit sapaatip akunnerani matumani tallimanngorneq tikillugu tunillatsissimasut sisamat paasineqarsimavoq. Atuartut misissortinnerminni tunillatsissimanngikkunik aatsaat atuariartoqqissinnaapput, Miniklubbimullu aatsaat oktobarip 20-ani tunillatsissimanngikkunik orniguteqqissinnaallutik.
Nuummiittumi Atuarfik Hans Lyngemi klassimi ataatsimi tuniluuttoqarpoq. Kommuneqarfik Sermersuumit tamanna Sermitsiaq.AG-mut uppernarsarneqarpoq.
Atuartoq ataaseq sapaatip akunnerani kingullermi arfininngornikkut ippigisaqalersimavoq, tassa meeraq tallimanngornermi tunillaassuisimasinnaavoq. Atuartoq pineqartoq sapaatip akunnerani matumani pingasunngornermi misissortikkami tunillatsissimasoq paasineqarpoq.
Nuup atuarfiini ukiakkut atuanngiffeqartoqarnera pissutigalugu sapaatip akunnerani matumani atuartoqanngikkaluartoq, atuarfiup pisortaata atuartup attavigisarsimasai attaveqarfigisimavai.
- Ippassaq unnukkut (sisamanngornerup unnukkuani) klassimi ataatsimi tunillatsissimasut allat pingasut paasineqarput. Tassunga atatillugu pisortap aamma angajoqqaat attavigisimavai, kaammattorlugillu misissorteqqullugit aamma meeqqat tunillatsissimasut pingasut isersimaqatigisimappatikkit imaluunniit miniklubbimeeqatigisimappatikkit pinaneersaartitsinissamik ippigisaqarnersullu maluginiarneqarnissaannik siunnersorsimallugit, kommunimit ilisimatitsissutigineqarpoq.
Ataasinngornerutinnagu misissortissasut
Atuartut atuarfimmi tunillatsissimasumut attaveqarsimasut ataasinngorpat atuariartoqqissinnaapput, tassa misissortinnerminni tunillatsissimanatik paasitinneqarunik ippigisaqanngikkunillu. Atuartut taamaalillutik atuarfissaminnik annaasaqassanngillat.
Atuartut AKO-mi tunillatsissimasumut attaveqarsimasut kaammattorneqarput pingasunngornermi oktobarip 20-ani misissortikkiartoqqullugit, aatsaallu tunillatsissimanngikkunik uteqqissinnaassallutik.