Atuarfimmi nerisitsisarneq, isiginnaartitsisartut tusagassiorfiillu aningaasanik annaasaqassasut
Naalakkersuisut 2020-mut Aningaasanut inatsisissaq sinneqartoortinniarlugu sipaaruteqarfiusinnaasunik nassaarniarlutik ulapissimaqaat. Imaaliallaannarmi atuarfimmi nerisitsisarnermut tapiissutit 1,4 millioner koruuniusut atorunnaarsippaat.
Obs. Allaaserisami akileraartartunit isertitassatut naatsorsuutit pillugit immikkoortoq allanngortinneqarpoq.
2020-mut Aningaasanut inatsisissami immikkuualuttut tamanut saqqummiunneqaqqammerput, takuneqarsinnaalerporlu nunap aningaasaqarnerata sinneqartoorutissaanut kikkut akiliuteqassanersut.
Kontorpassuit assigiinngitsutigut allanngortinneqaqqamerput. Akileraartartunit isertitassatut naatsorsuutit, raajanut akileraarutinit isertitassatut naatsorsuutit aamma avaleraasartuunut isertitassatut naatsorsuutit ilaatigut pineqarput.
Kalaallit Illui 1 millioner koruuninik annaasaqassasut
Kalaallit Illui eqqorneqassapput, aappagulu 1 millioner koruuninik annikinnerusunik pissarsissallutik. Tamanna aamma Nunatta Isiginnaartitsiarfianut atuuppoq. Equmiitsuliornernut allanut kulturimullu aningaasaliissutaasartut 300.000 koruuninik ikinnerulissapput, Kalaallilli Nunaanni naqitatigut tusagassiorfiit ingerlatsinermut tapiissutigisartagaat affaannanngortinneqassalluni, taamaalillutik annerpaamik 750.000 koruuninik tapiiffigineqarsinnaalerlutik. Tamatumunnga peqatigitillugu tnaqitatigut tusagassiorfiit suliniutaannut tapiissutaasartut affaannanngortinneqarput, 1 million koruuninik pissarsisaraluarput.
Meeqqat atuartut aamma eqqugaassapput, tassa atuarfiat atuartut nerisaqartinneqartarnerannut aaqqissuussamut ilaasimagunik.
Naalakkersuisut atuarfimmi nerisaqartitsinissamut 1,4 millioner koruuninik tapiissuteqarsimapput, kommunit taakkunannga pissarsiniarunik qinnuteqarfigisinnaasaannik. 1,4 millioner kooruunit 2020-mut Aningaasanut inatsisissamit peerneqarsimapput. Assersuutigalugu illoqarfiit pingaarnersaata kommunia 2019-imi 966.000 koruuninik pissarsisimavoq, Aningaasat kommuni aaqqissuussami peqataaginnassaguni nammineerluni nassaariniagassai.
Tunngaviusumik inatsisissaq pillugu isumalioqatigiissitaq immikkut 2,3 millioner koruuninnattoq
Akerlianik Tunngaviusumik inatsisissaq pillugu isumalioqatigiissitap immikkut ittumik aningaasartuutai matussuserniarlugit 2,3 millioner koruunik nassaartoqarsimavoq, isumalioqatigiissitami politikkerit ukiuni aggersuni sulinissaminni maanna aningaasarsiassaqalersussat piffissaq suliffigisassaat ukiup affaanik sivitsorneqarsimavoq.
Inuit Circumpolar Council 2020-mi sipaarniarfigineqassanngilaq, aningaasaliissutigisartagaali kingusinnerusukkut ukiumut1 million koruuninik ikilisinneqartassapput.