Atuarfimmi kaammattuisoq: Ilinniartitsisut ikioqqunerat paasilluarsinnaavara

Ukiuni kingullerni ilinniartitsisut atuartut inuttut ajornatorsiuteqartarnerat pillugu ikioqqullutit nilliaatigaat. Ilinniartitsisut meeqqat atuartinnissaanut piffissartik atorusunneruaat piffissarlu minnerusoq perorsaanermut inulerinermullu atorusullugu.

Tamanna atuarfimmi kaammattuisup Emilie Olsennip uppernarsarsinnaavaa.

- Ikiortissarsiorneq maanna paasisinnaallualerpara. Kakkaak inulerisoqarnissaa pisariaqarsimaq. Nammassimasaat annertoqaaq, nukippassuit inulerinermut atortarsimavaat, nukiit ilinniartitsinermut atorneqartussaagaluit. Tupinnaqaaq taama annertutigisumik suliaqarsimammata, atuarfimmi kaammattuisoq oqarpoq.

Emilie Olsen siullermi eqqarsartarsimavoq sooq ilinniartitsisut taama naammagittaalliortigisartut napparsimakulatigisullu.

- Maannakkut paasisinnaalerpara qanoq oqimaatsigisimassanersoq meeqqanut ajornartorsiortunut ilinniartitsisuuniarlutillu inunnik isumagittutut suliaqarsimanerat. Atuartut 20-uppata meeqqallu pingasut angerlarsimaffimminni ajornartorsiuteqarnertik peqqutigalugu aallaamaannaavippata atuartut 17-it sinneruttut ilikkagaqarusukkaluit tamakkiisumik aallunnissai killeqalersarpoq, Emilie Olsen oqarpoq.

Atuarfimmi kaammattuisartoq, Emilie Olsen socialrådgiver assistentimut, NLP-imillu ilinniagaqarpoq (tarnip pissusaanik passusseriaaseq nutaajusoq, aaqq.) ukiullu 13-it missaat inunerinermik suliaqarnikoq assigiinngitsorpassuarnillu misilittagalik atuarfimmi paasisaminut tupaallalluinnaqqavoq.

- Meeqqat suli ukiukillutik atugaat piviusut immaqa ilaatigut upperiuminaasinnaasut ilumut meeraqarpoq imak sakkortutsigisunik atugallit - imminorusunnerit, kinguaassititigut atornerlunneqarnerit, imigassamik ikioroornartumillu atornerluinerit, naartuersinnerit kinguaassiutitigullu nappaateqalersimanerit.

Pinngortitaq nakorsaatigalugu
Klassemi ilinniartitsisut atuarfimmi kaammattuisartumut pisariaqartillugu innersuussisarput. Kaammattuisullu suliassarilertarpaa atuartut angajoqqaavisalu aggersarnissaat. Tassanngaanniillu atuartumut angajoqqaavinut immaqalu qatanngutaanut qanoq iliuuseqarnissaq aallartittarpoq.

- Oqaloqatigiinnerit ingerlaannaq aallartittuaannanngillat. Meeqqat ilaat ima nuanniitsunik misigisaqartigisimasarput allaat ingerlaannaq oqaloqatigineqaannarsinnaanatik. Taamaattumik meeraq eqqissisaqqaartarpara immaqalu pinngortaliaqatigisinnaallugu. Paasitikkusullugu pinngortitamut aamma nukissanik aallertoqarsinnaasoq timerlu qasukkartinneqarsinnaasoq, taamaasillunga meeraq toqqissisimanissaa anguniartarpara, atuarfimmi kaammattuisartoq oqaluttuarpoq.

Emilie Olsen maanna qaammatit marluk missaani atuarfimmi kaammattuisutut sulereersimasoq.

- Atuartut arlallit aggeqqinnissaminnut qilanaalereerput, maannakkullu aamma meeqqat oqaloqatiginnissimasut atuarfimmut soqutiginninnerulernerat malunnarsereersimavoq, Emilie Olsen oqarpoq. Emiliettaaq oqaloqatiginninnermi titartaaneq titartaasitsinerlu atorluartarpai, meeqqat misigissusaat nammineq paasiniassagamigit aammali meeqqat nammineq oqariartuutini paasiniassammagit.

Atuarfimmi kaammattuisut pisariaqartitllugu, inunnik isumaginnittoqarfik, politiit, peqqinnisaqarfik, palaseqarfik tarnillu pissusaanik ilisimasallit suleqatigisarpai. Pisariaqartarporlu. Meeqqatta ajornartorsiutit atugaat sakkortuut pillugit quppernermi allami atuaqqigit.
Emilie Olsennilli aamma erseqqissarpaa Imanngitsoq atuarfiit nuanniitsuinnarnik nalaataqarfiusut aammali ilinniartsitisunik atuartunillu ulikkaarmat siunissamut ilungersuutilinnik.

Atuarfimmi kaammattorteqalerneq piviusunngorpoq Nalunnguarfiup Atuarfiani pisortap Jonathan Petersenip iliuuseqarneratigut.