Atuarfiliorniarneq qaqutigoortumik ingerlanneqartoq

2015-imi aalajangiunneqarpoq Qassiarsummi nutaamik atuartunut angerlarsimaffiliortoqarlunilu nutaamik atuarfiliortoqassasoq. Ukiulli tallimat sinnerlugit qaangiummata sanaartorneq suli naammassineqanngilaq, sanaartorniarnerlu suli kingusinaaqqittussanngorpoq, sanasut 2020-mi aasaanerani tunngavissamik suliaqarlutik aallartittussanngortullu Kommuni Kujallermi politikkerit inissisimaffisamik ataatsimoortitsinissamillu qularuteqaleriasaarmata.

Taamatut qaqutigoortumik ingerlatsisoqarsimanera IA-mi politikkerip Stine Egedep paragraf 37 naapertorlugu apeqqutaanut Ilinniartitaanermut Naalakkersuisup Katti Frederiksenip akissutaani atuarneqarsinnaavoq.

- Qassiarsummi meeqqat atuarfiannik atuartullu angerlarsimaffiannik sanaartorneq pilersaarutit malillugit 2020-mi juunimi aallartinneqarpoq. Tamatuma kingorna pilersaarutaasimavoq meeqqat atuarfiat atuartullu angerlarsimaffiat 2021-mi atulernissaminnut piareeqqassasut, Katti Frederiksen ilisimatitsivoq.

Allatut nalunaaruteqarneq

Kommunimit juunip 15-iani nalunaarutigineqarpoq, atuarfissap atuartullu angerlarsimaffissaata inissisimaffissaa akuerineqarsimasoq, sapaatilli akunneri marluk ingerlariiginnartut Namminersorlutik Oqartussat allatut nalunaarummik tigusaqarsimapput.

- Ullormi 30. juni suliniutigineqartup inissisimaffissaata Kommunalbestyrelsimit oqallisigineqarnissaa tikillugu meeqqat atuarfissaanut atuartullu angerlarsimaffissaanut toqqavissap assanneqarnissaa piaarnerpaamik unitsinneqarnissaa pillugu Kommune Kujalleq qinnuiginnissimavoq, naalakkersuisoq allappoq.

Tamatuma malitsigisaanik sanasut juulip pingajuani nalunaarfigineqarput ”Namminersorlutik Oqartussat Kommune Kujallermiit sukumiinerusumik ilisimatinneqarnissaasa tungaanut sulineq unitseqqillugu”.

- Taamaattoqarmallu meeqqat atuarfiata atuartullu angerlarsimaffiata atulivinnissaat suli ulluligaanngitsumut kinguartinneqartut, ilisimatitsissutigineqarpoq.

Innuttaasut tusaaniartarai

Borgmesteri Kiista P. Isaksen suliamut tunngatillugu oqaaseqarusunngilaq, kommunimili pisortaagallartoq Dorthe Bidstrup kommunip ingerlatsisimanera pillugu oqaaseqartinneqarluni.

Sanaartorneq sooq unitsinneqarsimava?

- Innuttaasut atuarfiup atuartullu angerlarsimaffissaata immikkoortinneqarnissaannik kissaateqarnera politikkikkut tusaaniarneqarusussimavoq. Soorlu allami inissisimaffiusinnaasumik periarfissaqarnersoq takorusunneqarsimasoq, Dorthe Bidstrup oqarpoq.

Ukiup affaa sinnerlugu susoqarsimannginneranut nassuiaatigineqarpoq, ”suliap suli aalajangiiffigineqarsimannginnera aamma politikkikkut ataatsimiititat arlallit suliarinneqqaartussaasimanerat. Aningaasaqarnermut ataatsimiititap aamma kissaatigisimavaa Namminersorlutik Oqartussani ataatsimiititalianik arlalinnik isumaqatiginninniartoqassasoq, tamannalu sivisuumik ingerlanneqartoq utaqqimaarneqartorlu”.

- Aalajangiunneqarsimavoq atuarfissaq atuarfitoqqap inaani sananeqassasoq, atuartullu angerlarsimaffissaat atuartut angerlarsimaffitoqaasa saniani inissinneqassasoq, Dorthe Bidstrup ilisimatitsivoq.

Sanasut qaqagu aallartissasut naatsorsuutigaajuk?

- Neriuutigaarput sapinngisamik upernaaq aallartippallaartinnagut suineq aallartinneqarumaartoq, Dorthe bidstrup akissuteqarluni oqarpoq.

Namminersorlutik Oqartussat sanaartornermut akiliissasut

2018-imut Aningaasanut Inatsimmi aningaasaliissutit atualertussanut atuarfeqarnermullu tunngasut konto pingaarnermi 84.40.10-mi Kommunit atuarfiini ittut Namminersorlutik Oqartussaniit kommuninut nuunneqarput.

- Qassiarsummi atuarfiup/atuartut angerlarsimaffiata sanaartornissaannut tunngatillugu sanaartornermut pilersaarutaasut akuerisat 2017-imeersut aallaavigalugit Naalakkersuisunit naammassineqartussaagaluarpoq. Suliniutip aningaasalersornissaa ukiut siuliini kontumi pingaarnermi aningaasat atorneqanngitsoortut atorlugit atortussanngortinneqartussaagaluartoq, ilisimatitsissutigineqarpoq.