Atuarfik peqqusisoqarneratigut nutarterneqassasoq

Paamiuni atuarfik annertuumik nutarterneqartussanngorpoq, atuarfik aserfallassimaqimmat aamma qatserisartoqarnermut oqartussat atuarfimmi isumannaallisaasimanermik naammaginninnginnerat pissutigalugu.

Kommuneqarfik Sermersuumit tamanna Naalakkersuisunut ilisimatitsissutigineqarpoq. Partii Naleqqami siulittaasup Hans Enoksenip Paamiuni atuarfik pillugu arlalinnik apeqquteqarneratigut Ilinniartitaanermut Naalakkersuisuugallartoq Karl Frederik Danielsen (S) akissutissanik kommunimut pissarsiniarsimavoq.

Hans Enoksenip ilaatigut apeqqutigisimavaa, Paamiuni Atuarfik Tuiisamut tunngatillugu Kommuneqarfik Sermersooq qanoq pilersaaruteqarnersoq.

Tassunga atatillugu kommunimit ilisimatitsissutigineqarpoq, atuarfiup iluarsartuunneqarnissaanut kommuni suliarinnittussarsiuussisoq, naatsorsuutigineqartorlu iluarsartuussinermut 20 aamma 25 mllioner koruunit akornanni aningaasartuuteqartoqassaasoq.

Atuarfik Tuiisap iluarsartuunnerarnerani suliassat:

Silammut iikkat oqorsaqqinnissaat, igalaat silaannarmillu aqutsissutit taarsersornissaat, silaannarmik aqutsissummik C02-mut aqutsissutitalimmik qitiusumik inissisimanngitsumik pilersitsinissaq kiisalu atuarfiup kujammut sammisortaani inini atuartitsiviusartuni atortut video-kkut nakkutigineqarnissaanut atortuliinissaq, matut ikuallattoqalersillugu nammineq ammarlutillu matusartut taarsersornissaat, ABA-atortumik pilersitsinissaq kiisalu qimaaffissiatut aqqutit qullilersornissaat.

Pissarsiffik: Kommuneqarfik Sermersooq

- Paamiuni atuarfiup iluarsarneqarnissaa pisariaqavippoq atuarfik aserfallassimaqimmat aammalu ikuallattoqalersillugu naammattumik isumannaallisaasoqarsimannginnerata kingunerisaanik qatserisartoqarnermut oqartussanit iluarsineqarnissaanut peqqussummik tigusaqartoqarnikuummat, Kommuneqarfik Sermersooq allappoq.

Nutaamik atuarfiliornissaq pisariaqarsinnaasoq

Kommunimit aamma nutaaqqinnaamik atuarfiliortoqartariaqarsinnaanera eqqarsaatigineqarsimavoq:

- lIuarsartuussinissat siuliani oqaatigineqartut aqqutigalugit atuarfiup illutaa pitsanngortinneqarsinnaassasoq siullertut nalilerneqarpoq, iluarsartuussinissarli ima annertutigisinnaalluni atuarfimmik nutaamik sanasinnaanissaq Kommuneqarfik Sermersuumit eqqarsaatigineqartariaqarsinnaalluni, Kommuneqarfik Sermersooq allappoq.

Enoksen: Atuartut peqqissutsimikkut maluginiagaqartalersimapput

Hans Enoksen naapertorlugu, atuartu arlallit atuarfimmiittarneq pissutigalugu peqqissutsikkut malugiagaqartalersimapput, politikkerimillu paasersunneqarpoq tassunga atatillugu misissuisoqarsimanersoq.

Karl frederik Danielsenip akissutaani atuarneqarsinnaavoq, atuarfiup naqqata ataa 2016-imi oquiarneqarsimasoq.

Meeqqerivinnilli atuarfinnillu sanaartornermut iluarsartuussinermullu suliassaqarfik 2018-imi kommuninut tunniunneqarsimavoq.

Kommuneqarfik Sermersooq tassunga atatillugu ilisimatitsivoq, kommunimi illoqarfinni atuarfiit tamarmik initaasa silaannarissusaat 2018-imi misissorneqarsimasut, misissuinerillu taakku inerneri ”kommunip tamatuma kingorna kommunimi atuarfiit iluarsartuunneqarnissaannut pingaarnersiuilluni tulleriiaarinerani aallaavigineqarsimasut.”

Atuarfik Tuiisaq 1972-imi sanallugu naammassineqarpoq.