Atuarfik nutaaq ilinniartitsisussaaleqisoq
Sinaakkutit nutaat ajornartorsiutinut tamanut aaqqiissutaaneq ajorput, tamanna Narsami misilittakkat takutippaat, tassani atuarfik ukiunik marluinnarnik pisoqaassusillip unammilligassatoqqat sorsuutigai
Nunami atuarfiit kusanarnersaasa ilaanni – Narsap Atuarfiani, 2016-imi nutaamik sananeqarluni nutarterneqartumi – ukioq atuarfiusoq naggataarneqaqqammerpoq, AG allappoq.
Sulili politikerit, ingerlatsivimmi sulisut atuarfimmullu attuumassutillit, Kujataani meeqqat atuarfiata iluatsilluarnissaanik takorluukkap piviusunngortinnissaanik sorsuutiginnittut, siunissami sakkortuunik ilungersuutigisassaqarput.
Ullumikkut atuarfimmi atuartitsisunit 21-init 13-iinnaat ilinniartitsisutut ilinniarsimasuupput, ilinniartitsisutullu atorfiit 25-t tamakkerlugit inuttalerneqarnissaat ilimanarpallaanngilaq. Ajornartorsiut tamanna Narsap kisimi atunngilaa, aamma kommunip sinnerani nunamilu tamarmi atugaavoq.
Kiisalu Narsap atuarfiani qullersat atuarfiup nutaanngorsarneqarnera sioqqullugu kingornatigullu taarserartarsimapput. Tamanna kommunip atuarfeqarfimmik ingerlatsiviata pisortaata Jens Korneliussenip nassuerutigaa. Erseqqissarpaali ilorraap tungaanut ingerlasoqartoq.
Naliliinissamut siusipallaaqaaq
Taanna aamma oqaluttuardpoq suli ajornartorsiuteqaraluartoq atuartut avatangiisini nutaani inuulluataartorujussuusut.
- Isumaqarluinnarpugut atuarfimmi avatangiisit nutaat atuartut pitsaasunik avatangiiseqarnissamik pisariaqartitsinerannut pitsaasorujussuarmik sunniuteqarsimasut, illoqarfimmilu ininut atuartitsivinnut assigiinngitsunut angalaqattaarunnaarneq pissutigalugu atuartut siusinnerusumit eqqissisimanerulerulersimapput atuarfillu kajungernartinnerulersimallugu, taanna oqarpoq.
Allaaserineqartoq aviisimi AG-mi aqagu pingasunngornermi saqqummertussami tamakkiisumik atuarneqarsinnaavoq. Aviisi uani pisiariuk: