Atuarfik najornagu atuartitsineq iluatsilluartoq

Nunatsinni imarpik akimordlugu avataani uuliasiornermi ilinniagaqartitsineq pillugu videokut isumasioqatigiissitsineq siulleq, Norgemit, Savalimmiunit, Islandimit Nunatsinnillu peqataaffigineqartoq iluatsilluarsimalluni naammassivoq.
Taamatut tusagassiorfinnut nalunaarutikkut paasissutissiivoq Sisimiuni Aatsitassalerinik Ilinniarfik.
– Peqataasut tamarmik isumaqatigaat videokut ataatsimeersuarnermi atortunik atortulerluni isumasioqatigiinneq ataatsimut pissarsilluarnissamut immikkut ilisimasalinnik ilisimannittullu nunanit arlalinneersut taamatut katersortitsineq pitsaasuusoq. Isumasioqatigiinnerup taamaattup suliniutigeqqinnissaanut peqataasunut 50-t missaanniittunut timmisartumi billetsit najugaqarnissamilu sipaarneqartut tunngavissaalluarput. Ilanngullugu videokut ataatsimeersuarnermi atortut atuartitsinermut naleqqulluarput, tamatumani ilinniartitsisoq nunami allamiilluni ilinniartinneqartulliu nunani allaniillutik, ilinniagaqartitsinermut pisortaq Hans Hinrichsen oqarpoq.
Isumasioqatigiinnikkut nunat peqataasut ilinniagaqartitsinikkut arlalinnik nalissaqanngitsunik periarfissaqalerput, imminnillu misilittakkaminnik ilinniaqatigiissinnaallutik taamaasilluni atlantikup avannaani ilinniagaqartitsineq qaffassarlugu.
– FING-mik suleqatigiinnermi peqataanerput tulluusimaarutigaarput, avataanilu uuliasiornermik pikkorissartitsinissat ilinniagaqartitsinillu, piumasaqaatinik qaffasinnerpaamik piumasaqaatillit, ingerlannissaat qilanaaralutigu, Hans Hinrichsen oqarpoq.
Taassuma oqaatigaa siumut isigisumik sulissutigineqarpoq Sisimiuni Aatsitassanik Ilinniarfiup suli pilerinarnerulersinnissaa.
– Avataani uuliasiornermi sulinisssamut pikkorissartitsinerit aallartitsinnagit naleqquttuunermut allagartaqarnissamik peqqissutsimillu misissorneqarnissamik pisariaqartitsineq misissussavarput. Avataanilu uuliasiornermi ilinniarfinni atornerluinermut politikkimik eqqussisoqarnissaa misissussavarput, Hans Hinrichsen oqarpoq.
Tamatuma saniatigut oqaatigaa Atlantikup avannaani assigiiaassuseqarnissaq sulissutigineqartoq, taamaasilluni pikkorissartut ilinniarfiup ilaa nunami ingerlateriarlugu nunami allami, soorlu Savalimmiuni, Norgemi Nunatsinniluunniit nangissinnaallugu.