meeqqat atuarfiat
Atuarfiit pisortaat Nivi Olsenip saassuppai
Ilinniartitaanermut naalakkersuisoq isumaqarpoq meeqqat atuarfianni pisortat ajornartorsiutaasut
– Meeqqat atuarfianni ajornartorsiutaapput pisortat sivisuvallaamik atorfimminni atorfeqarsimasut.
Taamatut ilinniartitaanermut naalakkersuisoq Nivi Olsen, Demokraatit, KNR-mit apersorneqarluni oqarpoq.
Taanna isumaqarpoq tamanna pitsanngorsarneqassasoq kommunit oqaloqatigalugit. Tamannali assuarnartumik akulerunnerussaaq, ilinniartitstisut kattuffianni IMAK-imi siulittaasoq Sivso Dorph isumaqarpoq.
Isiginnaaginnarnianngilaq
Ilinniartitaanermut naalakkersuisut meeqqat atuarfiat naammagisimaarpallaanngilaa, atuarfeqarpallu naammattumik angusaqarneq ajortunik isiginnaaginnarnianngilaq.
– Ilisarnaatitta ilagaat sulisuvut allanngortikkuminaatsittaratsigik, inuit sivisuumik atorfimminniissimasut pineqaraangata, Nivi Olsen KNR-mut oqarpoq.
Assersuutissatut taavaa selskabersuit qullersaat angusaqanngikkaangata ingerlaannavik taarserneqartartut. Atuarfimmullu ajornartorsiortumut akisussaaffiup ilarujussua atuarfiit qullersaanniippoq.