Atualernissaq Qeqqata Kommunianiit kinguartinneqarpoq
Sisimiuni meeqqat atuarfiani atualertussat ataasinngorpat atualertussaagaluarput, illoqarfimmilu coronap tuniluunera peqqutaalluni ulloq atualerfiusussaq sapaatip akunnerani kinguartinneqarnissaa borgmesterip aalajangiuppaa.
Sisimiuni Minngortuunnguup atuarfiani Nalunnguarfiullu atuarfiani ukiup atuarfiusup aallartinnissaa sapaatip akunneranik kinguartinneqarpoq. Ulloq atualerfissaq ataasinngorneq 16. august-imut nuunneqarpoq.
- Takusinnaagatsigu suli tuniluuttoqartoq, ataasinngorpallu atualertussat atualertileraluarutsigu suli tunillaasuunerup annertunerusinnaanera aalleqqutigigatsugu taamatut aalajangerpugut, borgmesteri Malik Berthelsen (S) Sermitsiaq.AG-imut oqarpoq.
Maanna Sisimiuni tunillatsissimasut 22-iupput. Tunillatsissimasut arfineq-pingasut arfininngornermi paasineqarput, tallimanngornermilu pingasut tunillatsissisut paasineqarlutik.
Qeqqata Kommuniani coronalerisut atualertussat ulloq atualerfissaat sapaatip akunnerani kinguartinneqarnissaanik borgmesterimut innersuussuteqarput. Kommunalbestyrelsillu paasitinneqareerput.
Sisimiuni taamaallaat ulloq atualerfiusussaq kinguartinneqarpoq, Maniitsumi nunaqarfinnilu atuutsinneqarani.
- Siusinnerusukkut takutereerparput mianersornitsigut tuniluunneq siammatsaaliorsinnaallutigu. Taamaattumik kaammattuutigerusuppara, uani pisumi ilungersunartumi tamatta ikioqatigiilluta innersuussutit malinnerisigut covid-19 siammatsaaliussagipput, Malik Berthelsen oqarpoq.
Kommuni qanermut assiaquteqarnissaq, allat qanillinaveersaarnissaat, errortukulanissaq, ersiuteqaraanilu angerlarsimaannarnissamik suli kaammattuuteqarpoq.
Sisimiuni maleruaqqusat sisamanngornermi Naalakkersuisuniit sukaterneqarput. Maleruaqqusat maanna Upernavimmi nunaqarfigisaanilu Aasiannilu atuutsinneqartut Sisimiuni aamma atuutsinneqalerlutik.
Nunatta avataanersut Nunatsinnut tikinnialeraangamik tamakkiisumik akiuussusersorneqarsimanissaat marlunngornermiit atuutsinneqalissaaq.