Skip to main content

Atuakkiortoq inuusuttoq nersornaaserneqarnissamut innersuunneqarpoq

Ilisimatusarfimmi kulturilernermi inuiaqatigiilerinermilu kandidatitut ilinniagaqartoq Pivinnguaq Mørch Nordisk Råds litteraturprisip nersornaasiuttagaanut innersuunneqarpoq

- Innersuunneqarnissara ilimaginngikkaluarpara. Maniguullunga misigisimavunga, aamma innersuunneqarnera nuannaarutigeqaara.

Nordisk Råds litteraturprisip nersornaasiuttagaanut innersuunneqartoq 25-nik ukiulik Pivinnguaq Mørch Sermitsiaq.AG-mut oqarpoq. Taassuma atuakkiaqqaani 'Arpaatit qaqortut' innersuunneqaatigaa.

Atukkanik saqqummersitsisarnissamut takorluukkat

Atuagaq 2013-imi oqaluttuaaraliartai naammassivai, atuagarlu 2015-mi saqqummerluni. Atuagaq qulingiluanik oqaluttuaaraliaqarpoq kiisalu 14-nik taalliartaqarpoq, tassani misigissutsit kiisalu Kalaallit Nunaanni attuumassuteqartunik tunngassuteqarluni.

- Atuakkap siunnertaasa ilaraat Nunatsinni atuartartunut sunniuteqarnissara. Saaffigineqartarpunga atuagaq nuannarillugu oqariartuuteqartunik, tassani misigissutsit tungaatigut imalinnik atuagaqarlutik nuannarisimallugu oqariartortarlutik. Meeraallungali oqartarpunga atuakkiorusullunga, tassami atuakkiorneq angutivittut isigineqarneq ajorpoq. GU-rnerma nalaani atuakkiorneq soqutigeqqilerpara soqutiginninnera uninngatereerlugu. Tassami allatamma oqariartuutigineruai ingerlariaqqinneq kiisalu akuersineq, taakku Nunatsinni atuassallugit amigaataasarmata allappakka, Pivinnguaq Mørch oqaluttuarpoq. Taanna Upernavimmiuuvoq, maannali Ilisimatusarfimmi kandidatitut ilinniagaqarluni.

Nutserneqassanngilaq

Atuakkap nutserneqannginnissaa Milik Publishingimut piumasaqaatiginikuuaa.

- Danskisut nutserneqannginnissaa piumasaqaatiginikuuara kalaallinut apuuteqqaarusukkakku. Atuakkialerinerup tungaatigut Nunatsinni atuakkat ikipput, aamma soorlu taalliat nutserneqaraangata isumaat allanngulaartarnerat pinngitsoortinniarlugu nutserneqannginnissaa piumasarinikuuara, oqarpoq.

Ataatanilu atuakkamik saqqummersitsipput 'Kinaassuseq'-mik qulequtaqartumik. Atuagaq decembarimi saqqummerpoq. 

- Maannakkut sivitsorpoq kingullermik allataqarama, kisianni qangalili ingerlataqarpunga suli naammassinngitsumik. Atuakkamik saqqummersitseqqinnissara naatsorsuutigaara, Pivinnguaq Mørch ilisimatitsivoq.

Nordisk Råds litteraturpris Sverigep illoqarfiisa pingaarnersaanni Stockholmimi nersornaat tunniunneqassaaq oktobarip 29-ani. Nersornaaserneqartoq aamma 350.000 koruuninik pissarsitinneqassaaq.

Nersornaammut innersuunneqartut katillugit 13-iupput.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER