Atuagaq siullerpaaq kalaallisuumit inuktitumut nutserneqartoq
Atuagaq kalaallisut allanneqarsimasoq siullerpaaq, inuktitut oqaasiinut nutserneqarsimalluni saqqummerpoq.
Silap pissusaata allanngoriartorneranut tunngasoq atuagaq "Sila" Lana Hansenimit kalaallisut allanneqarluni atuakkiarineqarsimasoq, atuakkani siullerpaalluni kalaallisuumiit inuktitumut nutserneqarsimalerpoq.
Atuakkiortoq, Lana Hansen, Sermitsiaq.AG-mut taama nalunaaruteqarpoq.
Atuagaq "Sila" 2009-mi siullerpaamik saqqummerpoq. Atuakkami nukappiaraq Tulugaq, atuarnermik qatsussilersimasoq oqaluttuarineqarpoq. Taassuma tulukkatut timmisinnaalernissani takorloortarpaa. Sinnattumini sermersuup anersaava naapippaa, taassumallu piumaffigaa pinngortitap mingutsikkunnaarnissaanut ikioqqulluni.
Atuakkami pingaarnertut inuttaasup angalanermini nunap uumasui arlallit naapippai.
- Atuakkiara siullerpaalluni Inuit oqaasiini marlunni nutserneqarlunilu saqqumersinneqartoq, tamanna assut tulluusimaarutigaara, Lana Hansen allappoq.
"Sila" Canadami tallimanngornermi oktoberip aappaani saqqummersinneqarpoq, saqqummersitsivik Avataq Inuit aqqutigalugu. Nutserneqarneranut Inuit taperisat, Canada aningaasaliilluni tapiisimavoq.