Atuagaq kalaallisooq filminngortinneqalersoq
Hans A. Lyngep atuakkiaa "Umiarsuup tikinngilaattaani" najoqqutaralugu filmimik suliaqartoqartussanngorpoq. Atuagaq naatsuliaralugu isiginnaagassiarineqareernikuuvoq, taannalu maanna tallineqarluni filmitut takkajaatut suliarineqartussanngorpoq.
Umiarsuup tikinngilaattaani innuttaasut sulerippat?
Filmimik isiginnaartussat maanna qilanaarisinnaalerpaat Hans A. Lyngep atuakkiaa "Umiarsuup tikinngilaattaani" najoqqutaralugu filmiliaq.
Atuagaq najoqqutaralugu siorna naatsuliamik filmiliortoqarpoq "Before One - Umiarsuup Tikinngilaattaani". Atuakkami innuttaasut umiarsuup tikinngilaattaani sunersut oqaluttuarineqarpoq.
Nunat tamalaat akornanni nersornaaserneqartut
Naatsuliaq tigulluarneqarpoq, Los Angelesimilu marlunnik nersornaaserneqarsimalluni.
Naatsuliaq maannatallineqartussanngorpoq, atuagarlu tamakkerlugu filmitut suliarineqassalluni. Naatsuliamik suliarinnittoq, Hanne M. Sørensen tusagassiorfinnut taama nalunaaruteqarpoq.
- Tulluusimaartorujussuuvunga Hans A. Lyngep atuakkiaa "Umiarsuup tikinngilaattaani" najoqqutaralugu filmimik suliaqartussanngorama, Hanne M. Sørensen oqarpoq.
Taanna oqaluttuarpoq naatsuliap isiginnaartartunit nuannarineqarluarnera pissutigalugu filmimik takinerusumik suliaqarnissaq isumassarsiarisimallugu. Nersornaatit marluk saniatigut, nersornaatinut allanut pingasunut aamma innersuunneqarsimavoq, ajugaasuunanili.
Kalaallisuunik atuakkanik soqutiginninneq
- Nunatsinni kulturikkut kingornussassatta piujuartinnissaat uannut pingaaruteqarpoq, aammalu isiginnaagassianngortinnissaat pingaartippara inuusuttatta atuakkanik nunatsinneersunik soqutiginninnerulernissaat anguniarlugu, oqarpoq.
Suliaqartup naatsorsuutigaa ”Before One – Umiarsuup Tikinngilaattaani” filminngortinnissaanut najoqqutassaq 2022-p naalernerani naammassereersimassasoq. Immiussinissamut suleqataasussanik nunatsinneersunik ujaasilluni aappaagu aallartissaaq.
Suliniut Namminersorlutik Oqartussat kulturikkut suliniutinut aningaasaliineratigut aallartissinnaanngorpoq.