Skip to main content

Attuumassuteqanngitsunit misissuisoqarnissaa borgmesterip siunnersuutigaa

Inissiaqarfinni marlunni attartortut inigisamut akiliuteqarnerminni 15-init 20 procentinut akiliivallaartarnerisa, Kommuneqarfik Sermersuup nassuerutiginninnerata kingorna, kommunimi taassumalu inissiaatileqatigiiffiani inigisamut akiliutit aalajangersarneqarnerannut avataanit misissuititsisoqassasoq, borgmesterip Avaaraq Olsenip (IA) siunnersuutigaa.

Attartortut arlallit ukiuni arlalinni saaffiginnittareerlutik Kommuneqarfik Sermersooq politiinut nalunaarutigaat. Nalunaarutiginninnerup kinguninngua kommunip suliami isumaa mumippoq, attartortullu inigisamut akiliutaat 15-init 20 procentinut apparneqassasut nalunaaruteqarpoq.

Kommunimi kommunillu inissiaatileqatigiiffiani Iserit-imi inigisamut akiliutit aalajangersarneqarnerannik attuumassuteqanngitsunit misissuisoqarnissaanik, borgmesteri Avaaraq Olsen (IA) kommunalbestyrelsimut siunnersuuteqarniarluni ilisimatitsivoq.

- Avataanit attuumassuteqanngitsumit pisoq misissortittariaqaripput isumaqarpunga, tassanngaanniillu nassuiaateqarluta, innuttaasut taamaalillutik inigisamut akiliutigisartakkaminnik eqqortuuneranik toqqissisimallutik tatiginninniassammata, Avaaraq Olsen, tusagassiuutinut nalunaarummi allappoq.

Ernumasoqarnera paasisinnaagaa

Inissiat sinnerini inigisamut akiliutit misissorneqartut, kommuni Sermitsiaq.AG-mut allagaqarluni akissuteqarnermini ilisimatitsinikuuvoq. Borgmesterili aamma attuumassuteqanngitsumit misissuisoqarnissaanik kissaateqarpoq.

LÆS OGSÅ: Politiinut nalunaaruteqartoqareersoq: Kommunip inigisamut akiliut procentinik 15-init 20-nut apparniarpaa

- Inissiat taakku marluk saniatigut akiliinikippallaartoqarpa imaluunniit akiliivallaartoqarpa? Inigisamut akiliutip aalajangersarneqarneranut suna tunngaviua? Innuttaasut akornanni ernumasoqarnera borgmesteritut paasisinnaavara, taamaattumik tamanna qulaajassavarput, taanna allappoq.

Inissiaqarfiit taakku marluk pineqartut, ineqarneq pillugu suliamik taagorneqartumut ilaapput, kommuni tassani Nuummi ingerlatseqatigiiffimmit namminersortumit inissianik 400-nik attartoriarluni sulisunut innuttaasunullu initaarnissamut utaqqisunut allattorsimaffimmiittunut attartortitseqqippoq.

Kukkunersiuinerup ajornartorsiut tikkuaraa

Inissiarpassuarni inigisamut akiliutip aalajangersarneqarnera, ininik attartortitsisarnermut inatsisit malinneqarnissaat qulakkeeqqaarnagu pisimasoq, marsimi 2022-m ingerlatsinermik kukkunersiuinerup tikkuareerpaa. Inatsisilli malinneqarsimasinnaanerat ilimagineqarsinnaanerarpaat, kukkunersiuisoq naapertorlugu inigisamut akiliut appasissumik inissinneqarsimammat.

LÆS OGSÅ: Kommuni inissiaatileqatigiiffillu attartortunit naammaginninngitsunit politiinut tunniunneqartut

Ineqarneq pillugu suliami inissianut inigisamut akiliutip affaata missaa Kommuneqarfik Sermersuup aamma akilertarpaa – inissiaqarfiit marluk politiinut nalunaarutiginninnermut tunngasut ilanngullugit.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER