Attaveqartarnermut ataatsimiititaliaq nutaaq aqqutigalugu Savalimmiut Nunarpullu paasissutissanik allanut oqaatigeqqusaanngitsunik pissarsisinnaalissapput
Savalimmiut, Kalaallit Nunaata Danmarkillu akornanni naalakkersuinikkut attaveqartarnermut ataatsimiititaliamik pilersitsisoqarmat, sillimaniarnermut politikki pineqartillugu Savalimmiut eqqaani susoqarnersoq Savalimmiormiunit pitsaanerusumik paasisaqarsinnaalissapput. Lagmandi taamatut oqarpoq.
Lagmandi Bárður á Steig Nielsen isumaqarpoq, attaveqartarnermut ataatsimiititaliamut nutaamut suliakkiissut ataasinngormat Statsministeeriaqarfimmi atsiorneqartoq Savalimmiunut pingaaruteqarluinnartumik sunniuteqassasoq.
Savalimmiuni, Kalaallit Nunaanni Danmarkimilu ministerit katillugit quliusut attaveqartarnermut ataatsimiititaliami, nunanut allanut, illersornissamut sillimaniarnermullu politikkikkut suliassanik suliaqartartussat ilaasortaapput.
- Maanna Savalimmiunut tunngatillugu paasissutissanik tamanik pissarsisinnaanngorpugut. Suliassanut assersuutigalugu taasinnaavarput, Savalimmiuni kalerrisaarummik radariliinissaq pillugu suliaq attaveqartarnermut ataatsimiititaliami suliarineqarsinnaavoq. Savalimmiut eqqaani susoqarnersoq siunissami ajornannginnerusumik paasisaqarfigisalissavarput. Tamanna kissaatigisarsimavarput, Bárður á Steig Nielsen oqarpoq.
Isumannaallisaasarfimmik pilersitsissimasut
Paasissutissanik allanut tusarliuteqqusaanngitsunik siusinnerusukkut pissarsiarineqarneq ajortunik maanna pisssarsisinnaalissaagut, Bárður á Steig Nielsen erseqqissaavoq. Taamaammat Savalimmiuni isumannaallisaasarfimmik pilersitsisimavugut, tassa allanik tusarnaarneqarata paasissutissat allanut tusarliuteqqusaanngitsut pillugit Danmarki oqaloqatigisinnaaniarlugu.
- Savalimmiuni paasissutissanik taamatut ittunik pissarsisarnissamut piareersianiarluta piareersarsimavugut. Isumannaallisaanermi siunnersuisoqatigiit pilersissimavagut teknikikkullu atortunik ikkussuisimalluta, taamaalilluta isumannaatsumik avammut oqaloqateqarsinnaalerluta, lagmandi oqarpoq.
Naalakkersuisut Siulittaasuat mianersortoq
Kalaallit Nunaanni Naalakkersuisut Siulittaasuata Muté B. Egedep isumaqatigiissut aamma tikilluaqquaa.
- Nunatsinni Suliassaqarfiit ilaannik Nunatsinnut angerlaassisimavugut ataqqineqartariaqartunik. Taamaammat nunat pingasut akimorlugit illersornissamut, sillimaniarnermut nunanullu allanut politikkikkut assigiimmik ilisimasaqalerniarluta attaveqartarnermut ataatsimiititaliaqalernerputy pingaaruteqarpoq, Muté B. Egede oqarpoq.
Muté B. Egedep nunut allanut susassaqarfik Pele Brobergimit, Danmarkimut atatillugu isornartorsiuisarnini pillugu isorineqartaqisumit tigoqqammerpaa. Naalakkersuisut Siulittaasuata allatut ingerlatsiniarnerluni oqaatigerusuppallaanngilaa.
- Kalaallit Nunaata kalaallillu innuttaasut soqutigisaat isumagisussaavakka. Siunnerfik tamanna aqqutigalugu ingerlatsissaagut. Naalakkersuisuni tamanna tunngavigalugu sulisussaavugut, Muté B. Egede oqarpoq.