Attaveqarfeqarnerup efterskoleni atuartut atuarunnaarsinnaanerat pinaveersaartittarpaa

Ukiut tamaasa kalaallit inuusuttut 300-t missaannik amerlassusillit Danmarkimi efterskolertarput. Taakku 17 procentii atuarfissaq suli naanngitsoq taamaatiinnartarput. Kalaallit inuusuttut amerlanerit ataatsimooraangata taamaatiinnartartut ikinnerusarput.

Danmarkimi højskoleqatigiittut amerlarugaangata atuarnerup naammassineqarnissaa ajornannginnerusarpoq.

Peqatigiiffiup Kalaallit Meerartaasa Ilinniartitaanermullu Aqutsisoqarfiup nalunaarusiortitaanni taama erseqqitsigisumik inerniliisoqarpoq

Kalaallit efterskoleni atuartut 17 procentii atuarnerminnik unitsitsiinnartartut, Kalaallit Nunaanni inuusuttut amerlanerullutik ataatsimooraangata unitsitsiinnartartut 7 procentiinnaasarput.

Bjarke Flyvholm Allumi, Kalaallit Meerartaasa kalaallinut inuusuttunut Danmarkimi efterskolertunut attaveqaatitut neqerooruteqartarfianni pisortaavoq, taassumalu tamakku imminnut ataqatigiinnerat tupaallaatiginngilaa.

- Kalaallit inuusuttut kalaallinik inuusuttunik allanik attaveqaateqartarnerisa ataatsimoorfeqartarnerisalu pingaaruteqassusaat tupiginngilara. Allu aqqutigalugu inuusuttut Danmarkimi efterskolertut kiserliortutut misigisimasut imaluunniit efterskoleriaatsimut naleqqutinngitsutut misigisimasut ataatsimoortinneqartarput. Inuusuttut Danmarkimi atuarnerminnik naammassisaqarnissaannut pingaaruteqarluinnarpoq, toqqissisimanissaat kalaallinillu inuusuttunik allanik peqateqartarnissaat, taanna tusagassiorfinnut nalunaaruteqarnermi oqarpoq.

Imminermisut misigisimasunik naapitsineq iluaqutaasartoq

Allumit ukiup atuarfiup saniatigut tallimariarluni sapaatip akunnerisa naaneranni angalasarnissaq inuusuttunut neqeroorutigineqartarpoq, inuusuttut kulturi aatsaat takusartik pillugu imminnut oqaloqatigiissinnaapput, angerlarsernerit qanoq isumagineqarsinnaanersut pillugit oqaloqatigiissinnaapput, aammali siunissartik pillugu pilersaarutitik oqaluuserisinnaavaat.

Neqeroorullu iluaqutaasimarpasippoq. Atuartummi ukiup atuarfiusup 2018/2019-ip ingerlanerani Allumut attumassuteqarsimasut 92.2 procentii atuarnerminnik naammassinnissimapput

Ukiut kingulliit pingasut kingumut qiviaraanni, inuusuttut atuarnerminnik unitsitsiinnartarnerannut pissutaanerpaasarput anisitaaneq imaluuunniit atugarliorneq/inerissimannginneq. Tulliullutik pissutaasarput tarnikkut ajornartorsiuteqarneq angerlarsernerluunniit.

Nukapiaqqanut sanilliullutik niviarsiaqqat uniinnartartut amerlanerusut

Oqaatsit qaqutiguinnaq pissutaatinneqartarput.

Niviarsiaqqat nukappiaqqaninngarnit atuarnerminnik unitsitsiinnarnerusarput. Ukiuni kingullerni pingasuni uniinnarsimasunit 142-usunit niviarsiaqqat 90-it uniinnarsimapput.

Anisitaanerinnaat eqqarsaatigissagaanni, nukappiaqqat suli anisitaasoqakulaarnerupput. Niviarsiaqqalli anisitaasartut ukiut pingasut taakku ingerlaneranni amerliartorsimapput.

Ilinniartitaanermut Aqutsisoqarfik soqutigisalinnik martsip qaammataata aallartinnerani ataatsimiigiaqqusisimavoq, tassani Efterskolertut peqatigiiffiani, Kalaallit Illuinit, Peqatigiiffik Kalaallit Meerartaannit sinniisuutitat Ilinniartitaanermut Aqutsisoqarfimmi sulisut peqatigalugit ilaatigut oqaluuserissavaat, suliniutit sorliit aallartinneqarnissaat naapertuunnersoq.

Powered by Labrador CMS