Attassiniarnermik misiliineq: Mittarfiit nutaat ammarnissaasa tungaanut ukiup affaanut akissarsiaqartitsineq

Nuummi mittarfissuup sanaartorneqarnerata piareeriartuaarnerani Kangerlussuarmi annertuumik mumikkiartortoqarpoq.

Nuummi mittarfiup Atlantikoq qulaallugu timmisartortitsinerit tamakkerlugit tigussagai naatsorsuutigineqarpoq, taamaalillunilu ilaasut amerlanerpaartaat nunaqarfiup innutaasuinut amerlasuunut suliffeqartitsisut Kangerlussuup mittarfia aqqusaartarunnaassavaat.

Air Greenland nunaqarfimmi amerlasuunut sulisitsisuuvoq, ingerlatseeqatigiiffik tassani 60-t missaanniittunik sulisoqarpoq. Ingerlatseqatigiiffik niuernikkut tunngavissaqarpat Kangerlussuarmut timmisartumik angallassisarniarpoq, kisianni pissutsit maanna nalunarput.

Sulisut attanniarlugit aamma sulisut soraarnissaat pinngitsoortinniarlugu kattuffinnut arlalinnut isumaqatigiissusiortoqarsimasoq, sulisoqarnermut pisortaq Mads B. Christensen oqaluttuarpoq.

Sulisut annilaangapput

Air Greenlandip taamaalilluni mittarfiit nutaat ammarnissaasa tungaanut suliap nanginneqarsinnaanissaa naatsorsuutigaa:

- Sulisut annilaangasorujussuupput. Qanoq pisoqassanersoq, sumi najugaqassanerlutik assigisaanillu apeqquteqartarput, apeqqutillu taakku sivisuumik apersuutigineqarput, Mads B. Christensen oqaluttuarpoq.

Naak attassiniarnermut isumaqatigiissutit kattuffinnut arlalinnut isumaqatigiissutigineqaraluartut, pingaarnerit assigiipput.

Ukiup affaanut akissarsianik tapersiat

Sulisut mittarfiit nutaat ammarnissaasa tungaannut Kangerlussuarmiillutik suliinnassagunik, ukiup affaanut akissarsiat nalinginut tapersiaqassapput – tassani ukiap 2024 tungaanut sulisinnaagunik.

- Taamaalilluta sulisut attanniarsaraagut, Mads B. Christensen oqarpoq.

Air Greenlandip Kangerlussuarmi sulisui ilaatigut mekanikeriupput, mittarfimmi sulisut, nassatanik tigooraasut, usilerisut kiisalu assartugassanut immikkoortortaqarfik.

Tamaasa suliffissaqartinnissaa neriuutigigaat

- Ataatsimut isigalugu tamanut uagutsinni suliinnarusuttunut suliassaqartitsinissap qulakkeernissaa neriuutigaarput, tassami nuannarisatsinnik sulisorissaarpugut, Mads B. Christensen oqarpoq.

Sulisoqarnermut pisortap sulisunut isumaqatigiissutini pingaarnerit tunngaviusut pillugit nassuiaavoq:

• Sumiiffinni nutaani suliffissaqartitsineq malillugu sulisut tassani suliffeqarnissaannik neqerooruteqassaagut, aatsaat Kangerlussuarmi pisariaqartinneqassanngippata.
• Eqimattat atorfimmut nutaamut itigartitsisut, imaluunniit ajoraluartumik pisariaqartinneqassanngippata. Taakkununnga Kalaallit Nunaanni imaluunniit Danmarkimi sumiiffimmut allamut nuunnissaannut akiliuteqarnissamut neqerooruteqarpugut. Kangerlussuarmiiginnartussat inissiaatitsinni atorfissaqartinngikkutsigit tassaniiginnarsinnaapput.
• Sulisut mittarfiit nutaat ammarnissaata tungaanut Kangerlussuarmiiginnartussat attassiniarnermut tapersianik ukiup affaanut akissarsiat nalinginik pissarsissapput. Atorfimmik nutaamik neqeroorfigineqarnerat imaluunniit suliunnaarnerat apeqqutaatinneqassanngilaq.
• Aammattaaq Saviminilerinermik Ilinniarfik suleqatigalugu ilinniaqqinnissamut neqerooruteqarpugut kiisalu sulisut siunissami atorfigiligassaannut ilinniartitsinissamik neqerooruteqarluta.