Kommuneqarfik Sermersooq ilaatigut inissiaqarfinnik marlunnik, maskiinanik sanaartornermut atortunik qulinik aamma naqitsissutinik arlalinnik, isumaqatigiissutit Naalakkersuisunit akueriteqqaarnagit attartornermut imaluunniit attartortitsinermut isumaqatigiissusiornerminut Aningaasaqarnermut Naalakkersuisoqarfimmit siorna decembarimi sakkortuumik isornartorsiorneqarpoq.

Kommunit sinnerisa naatsorsuutaannik misissuinerup takutippaa, taakku arlallit aamma attartortitsinermut attartornermullu isumaqatigiissutit assigiinngitsutigut atortaraat.

Piffissami matumani Kommuneqarfik Sermersuup saniatigut, missingersuutinut inatsisip nutaap atulernerata kingorna kommunit allat attartortitsinermut attartornermullu isumaqatigiissutit sunik isumaqatigiissusiorsimanersut pillugit paasissutissanik qinnuigineqarsimanngitsut, Aningaasaqarnermut Naligiissitaanermullu Naalakkersuisoqarfik Sermitsiaq.AG-mut ilisimatitsivoq.

Killiliussaqarniartut

Isumaqatigiissutit kommunit Naalakkersuisunut 1. januar 2018-imit akuerisassanngorlugit pinngitsooratik nassiuttartussaavaat, inatsillu arlaatigut immikkut aaqqiissuteqarfigineqanngilaq imaluunniit killiliussaqanngilaq.

Naalakkersuisut killiliussaqarnissaannik Kommuneqarfik Sermersuup isornartorsiorneqarneranut atatillugu kommunimi pisortaaneq Ole Jakobsen kaammattuuteqarpoq, kommunit taamaalillutik Naalakkersuisunit akuersissuteqarfigineqartinnatik assersuutigalugu naqitsissutinik attartornissamut iliuuseqarnissamut kiffaanngissuseqarniassammata. Suliaq taanna maanna ingerlavoq:

- Kommuneqarfik Sermersuup kaammattuutaa eqqarsaatigalugu, nunatsinni kommunit attartornermut attartortitsisarnermullu isumaqatigiissusiortarnerisa akuerineqartarnissaannut piumasaqaatip killiliussaqarfiginissaanik nalunaarummik suliaqartoqarpoq, naalakkersuisoqarfik allappoq, nangillunilu:

- Tamatumunnga atatillugu naalakkersuisoqarfik kommuninut attaveqarniarpoq, inatsisillu atuuttut eqqumaffiginissaanik qulakkeerinnilluni, isumaqatigiissutillu pineqartut akuerisassanngortittassagaat.

Attartukkanik attartortitseqqusinngitsut

Attartukkanik attartortitsisarnermik atuisut ilagaat Kommune Kujalleq, ilaatigut biilinik arlalinnik attartugaqarpoq. Kommunip biilinik attartornissani Naalakkersuisunit akueritissimagaa, kommuni Sermitsiaq.AG-mut ilisimatitsivoq.

Kommunip assersuutigalugu aningaaserivimmit taarsigassarsilluni biilinit pisineranit, attartortitsineq akisunerussasoq Naalakkersuisut naliliisut, akuersissuteqarnermi atuarneqarsinnaavoq:

- Attartorneq tunngaviusumik aningaasaleeriaaseq aningaasartuuteqarfiungaatsiartarpoq. Kommunip aningaasartuutini sanaartornermut missingersuutinit akilersimagaluarunigit – imaluunniit aningaaserivimmit taarsigassarsinikkut akilersimagaluarunigit, attartornermit akikinnerusinnaagaluartoq, attartornermit paasissutissat nassiunneqartut takutippaat. Taamaattumik kommunip attartortarneq atugarissanngikkaa, naalakkersuisoqarfiup inassutigaa.

Naalakkersuisup attartortarnermut isumaqatigiissusiortannginnissamik inassuteqaataa malinniarlugu kommuni sulissuteqartoq, Kommune Kujallermi aningaasaqarnermut pisortaq, Kim Rosendahl ilisimatitsivoq.

Sermersuumut tunngatillugu suliami kommunimit attartortitsinermut isumaqatigiissutit assigiinngitsut akuerineqarnissaannut qinnuteqaatit suli suliarineqartut, Aningaasaqarnermut Naalakkersuisoqarfik ilisimatitsivoq.