Atsiornernik katersineq: Hans Egedep eqqaassutissaa peerneqarli

Hans Egedep eqqaassutissaa ulluni kingullerni eqqartugaangaatsiarpoq, taanna arfininngornerup unnuaani serlersaarfigineqarpoq, kingornalu eqqartorneqangaatsiarluni.

Maanna innuttaasup eqqaassutissaq peersinniarlugu atsiornernik katersivoq.

Ria Sivertsen digitalikkut atsiornermik katersineq aallartitaraa, marlunngornerup ullaani aallartillugu.

Oqartussaaqataaneq

- Ullorsiornitsinni inuit oqallinnerat malinnaaffigereerlugu atsiornermik katersinermik pilersitsiniarlunga aalajangerpunga. Hans Egedep Nunatsinniinnerani piliarisimasai atuarnikuuakka, kalaallit inuttut isigisimanngilai isumalluutaannarlu isigisimallugit. Tikiffini ataqqinngilai, ilaatigut siuaagut iperaatartarsimallugit, 19-nik ukiulik Ria Sivertsen Sermitsiaq.AG-mut oqarpoq. Taanna aasareerpa GUX-imi Nuummi 3.G-imi aallartissaaq.

Nuummi katersugaasivimmut eqqaassutissap inissinneqarnissaa siunnersuutigaa.

- Oqaluttuarisaaneq peerniarneqanngitsoq erseqqissaatigilara. Taamaattoq napanerata takutippaa suli pissaaneqarfigigaatigut nikagigaatigullu. Katersugaasivimmut inissinneqarpat inuiaqatigiittut ingerlariaqqinnertut takussutissaasinnaavoq, aamma takutissavarput pissaaneqartunut nipangiinnarnata akisinnaasugut, oqarpoq.

Atsiornerit katersat

Innuttaasut oqariartuutaat tusaaneqarsinnaaqqullugit atsiornernik katersineq pilersillugu aamma oqaatigaa.

- Isorineqartut mumisinneqarsinnaanerat aamma uani ersiutaavoq, atsiornerit 1.000-it katersorsinnaallugit neriuutigaara. Taakku Namminersorlutik Oqartussanut aamma Kommuneqarfik Sermersuumut ingerlatinneqaqqissasut takorloorpara, Ria Sivertsen oqarpoq.

Atsiornernik katersineq uani malinnaaffigineqarsinnaavoq