Atortut nutaat pinngortitami ikuallannernik qatserinermik ajornannginnerulersitsissapput
Namminersorlutik Oqartussat qamisaanermi atortunik nunamut kapputtakkanik pisivoq. Kangerluarsuk Tullermi pinngortitaq ikuallammat qamisaanermi atortut taakku atorlugit pilertornerusumik qamisaasoqarpoq.
Kommunini upalungaarsimasut qamisaatinik nunamut kapputtakkanik atortuuteqalissapput.
Nunamut kapputtakkat Kangerluarsuk Tullermi pinngortitami ikuallattoqarnerani qatserinermi pingaarutilittut atorneqarput. Pinngortitami sapaatit akunnerni arlalinni ikuallattoqareersorlu, atortut taakku atorlugit ullualuinnarni qamisaasoqarpoq.
Nunamut kapputtakkat nunap iluanut itisuumut imermik immiilluni atorneqartarput. Upalungaarsimasut taamaasiorlutik nuna masatsissinnaavaat. Sumiiffinni issoqarluartuni inneq nunap iluanut pisinnaasarpoq, nunallu qaavani ikuallannermik takussutissaqanngikkaluartoq inneq siarualertorsinnaasarluni. Atortut kapputtakkat pinngortitami ikuallannerup siaruannginnissaanut sakkussatut pingaaruteqartuupput.
Pinngortitamut avatangiisimullu naalakkersuisoqarfik qatserutinik nunamut kapputtakkanik 50-inik pisivoq. Taakku Upalungaarsimanermut aqutsisoqarfiup Kangerluarsuk Tullermi qamisaatissatut sanatitarisimavai. Kommunini upalungaarsimasut qamisaatinik nunamut kapputtakkanik taamaasillutik peqalissapput.
Kommunini upalungaarsimasut pinngortitami ikuallattunik qatserinermut akisussaasuupput. Tassalu aamma kommunit siunissami pinngortitami ikuallannernik suliaqarnissamut atortut inuttallu pisariaqartut pigineqarnissaat qulakkeertartussaavaat. Naalakkersuisoqarfiup nunamut kapputtakkat Upalungaarsimanermut aqutsisoqarfimmit pisiarai, pinngortitami ikuallannerit isumagineqarnerini kommunit suleqatigiinnissaat nukittorsaaviginiarlugu.
Tamatuma saniatigut Pinngortitamut Avatangiisinullu Naalakkersuisoqarfik kommunini upalungaarsimasut suleqatigalugit pinngortitami ikuallannerit pillugit isumasioqatigiissitsiniarpoq. Upalungaarsimanermut Aqutsisoqarfimmiit immikkut ittumik ilisimasalinnik isumasioqatigiissitsinermut peqataasoqarnissaa naatsorsuutigineqarpoq.
Tamatuma saniatigut nunap iluani pinngortitami ikuallattoqalernerani suliniutissanik nutaanik imaluunniit ulorianartorsiornernik killiliinissamut maleruagassanik pisariaqartitsisoqarnersoq Pinngortitamut Avatangiisinullu Naalakkersuisoqarfiup misissuiffiginiarpaa.