Atornerluineq: Kommunit ingerlatsinerinik atorunnaarsitsinissaq pillugu saqitsaanneq
Naalakkersuisoqatigiit avaqqullugit amerlanerussuteqartut kommunit isumaginninnikkut ingerlatsinerannik atorunnaarsitsinissamik eqqarsarnermut sakkortuumik mianersoqqusipput.
Kinguaassiuititigut atornerluinerit akiorniarlugit suliniuteqarnermi Danmarkimit ikiorneqarnissamut siunnersuut, Inatsisartut isumaqatigiissut naggataagut akuersipput.
Kisianni partiit suna tamaat isumaqatigiissutiginngilaat. Ingammik kommunit akisussaanerat isumaqatigiiffiunngilaq.
Peqqissutsimut isumaginninnermullu naalakkersuisup, Martha Abelsenip (S) aamma partiit naalakkersuisoqataasut oqaaseqartartuisa Karl-Kristian Krusep (S) aamma Anders Benjaminsenip (NQ), sullissineq kommunit akisussaaffigigaat arlaleriarlutik uterpaat.
- Suliassat naammassinissaasa oqimaappallaarnerat pissutigalugu kommunit ikiorneqarnissamik pisariaqartitsippata, taava Isumaginninnermut Aqutsisoqarfimmut isumaginninnermut naalakkersuisoqarfiup ataaniittumut ikioqqullutik saaffiginninnissamut pisussaaffeqarput, Karl-Kristian Kruse (S) taama oqarpoq.
- Kommunit ikioqqunngippata, tamatumalu saniatigut ajornartorsiutit iluarsineqarsimanngitsut takusinnaagutsigit, taava naggataagut ingerlatsinerannik atorunnaarsitsisoqarsinnaanera apeqqutigineqarsinnaasimassaaq.
Sullissineq inatsisinut naapertuutinngippat, piffissami aalajangersimasumi isumaginninnikkut suliassaqarfik Naalakkersuisut tigusinnaagaat, taassuma innersuussutigaa.
Suleqatigiinnissaq ernumassuteqarfigigaat
Danmarkimit ikiorneqarnissamik siunnersuuteqartut partiit sisamat isumaqatigiinngitsorujussuupput.
- Maani isumaqatigiissutigaarput, ajornartorsiutit annertuut Naalakkersuisut, Inatsisartut aamma kommunit akornanni qanimut suleqatigiinnikkut taamaallaat aaqqinneqarsinnaasut, Hans Enoksen (PN) oqarpoq.
- Kommunit aqutsinerannik arsaarneqarnissaat taamaammat iluaqutaanngilaq. Akerlianik suleqatigiinneq nukittorsassavarput, tassami eqqaamassavarsi kommunit tamarmik taakkuninnga ajornartorsiuteqarmata.
Justus Hansen (D), ilisimaneqartutut Tasiilami najugaqartoq, kinguaassiutitigut atornerluisarnerit pillugit oqaatiginnikkumannginneq illoqarfimmi qangali qaangerneqareersoq – maanna suliniutit ingerlasut ilaatigut iluaqutaallutik.
- Naalakkersuisut suliassaqarfimmik tigusissagaluarpata, taava ajoqataanik ingerlasoqarnissaa imaluunniit ajornerusumik ingerlasoqarnissaa ernumagaara, taanna oqarpoq.